McCainimut unammillertussaq Oregonimi qinersissutigaat
Barack Obamali siuaqqaqimmat Hillary Clintonip præsidentinngorniunnissamut anngunnissaa qularnaraluartoq tunniutiinnarnissaa ilimagineqanngilaq.
Hillary Clinton sapaatip akunnerani kingullermi West Virginiami ajugaanermisuulli Kentuckymi ajugaassangatinneqarpoq, Washingtonimilu aningaasatigut tapersersuisut katerisimaaqatigineranni aamma oqarfigereerpai tunniutiinnarnaviarani.
Tunniutiinnarusunnginnera alapernaattunit tupigineqaraluarpoq, Clintonili isumaqavissorpoq præsidentinngorniunnissami McCain ajugaaffigisinaallugu, Demokratillu partiianneersuugami demokratimik eqqarsartaaseq naapertorlugu tapersersorteqarnerpaaq ajugaassammat, tamannalu suli qulakkeerneqanngimmat qineqqusaartuarusuppoq.
Kiisalu Clintonip tapersersortini milliuunilippassuit, minnerunngitsumik arnat, narrujuummisikkusunngilai, taassumalu saniatigut eqqaamasariaqarpoq aamma USA-miikkatta, maanilu tunniutiinnarlutik ajorsartut nersualaarneqanngisaannarput. Ajugaasut nersualaaneqartaqaat, taavalu ajorsaraluarlutik suna tamaat atorlugu akersuussimasut nersualaarneqartaqalutik.
Taamaakkaluartorli Demokratit sinnerlugit taakku marluk, maanna imminnut unammisut isumaqatigiillutik nalunaareernikuupput, unammereerunik parteertik demokratinit tamanit naapiffiulluni ataatsimoorfiulerumaartoq. Obama ajugaasutut imminut suaarutigeqqajaagaluarluni mianersorpoq, nalunnginnamiuk maanna Hillary Clintonimut tapersersuisut kingusinnerusukkut tamarmik imminut tapersersuilernissaat pisariaqartissaqalugu, Steffen Gram Washingtonimiit nalunaarpoq.
