McCain Vietnamimi sorsoqataanikuuvoq
Amerikamiup senatorip John McCain-ip nunarput siorna tikeraarpaa – danskit avatangiisinut ministeriannit Connie Hedegård-imit qaaqqusaalluni – taanna Ilulissaniippoq, tassa nunarsuup kiatsikkiartornera nammineerluni isiminik takorusukkamiuk. Taamanili oqartoqarpoq præsidentimut qinigassanngortinniartup nunarput tikeraaraa – tamanna ilumoortortaqarsimavoq.
David Lettermannip tv-kkut aallakaatittagaani nuannarineqaqisumi ippassaq pulaartuuvoq tassanilu USA-mi præsidentinngorniarnini nalunaarutigaa.
Senator John McCainip Amerikami tusagassiorfiit atorlugit qinigassanngortinniarnini nalunaarutigiinnarsinnaagaluarpaa, kisianni aallakaatitassiortartumit David Lettermannimit aperineqarnissani orniginerusimavaa.
- Præsidentimut qinigassanngortinniarpit? Lettermann aperivoq.
- Matumuuna USA-mi præsidentimut qinersinissamut qinigassanngortinnera nalunaarutigaara, McCain akivoq.
John McCain kinguaariit sakkutuujulluartut pingajoraat. Timmisartunik sorsuutinik timmisartortartutut ilinniarsimasuuvoq Vietnam-imilu sorsoqataasimalluni. Tamaani sorsoqataatillugu timmisartua nakkartinneqarpoq McCainilu akeqqanit tigusarineqarluni. Ukiuni tallimani naalliutsitaaqaluni tigummisarineqarpoq, tamatumalu kinguneranik talliminik atuisinnaanera killeqalersimalluni.
McCain Amerikamiut nalinginnaasut republikaneriusut præsidentimut piukkussaraat. Taamaattorli partiimini ajugaaffiginiagassaqarpoq. Apeqqutini assigiinngitsuni partiimini qiterliuniartuuvoq taamalu parteeqatiminit talerperliuniartuusunit upperluarniartuusunillu nuannarineqarpallaartarani.
Sorsunnermut atatillugu aallaqqaataaniilli aalajangersimasumik isummertarpoq. Soorlu Irakimi sorsunnermut atatillugu isumaqarpoq ajugaasoqassappat amerlanerusunik sakkutuuliisoqartariaqartoq.
2000-imi præsidentinngorniarluni misiliigaluarpoq, ilisimaneqartutulli taamani qinigassanngortitassatut Bushimut ajorsarpoq.
