Max Madsen attaviitsutut qinigassanngorteqqippoq

Attaviitsutut qinigassanngortittup immikkoortut tallimat qineqqusaarutigai, tamatumanilu maani nunatsinni innuttaaasut  akisussaaffimmik suli annerusumik tigusinissaannik, inuussutissarsiutigalugu politikerinut naaggaarnissamik kalaallisullu kinaassutsimik nassaarniarnissamut kaammattuilluni.

-Kalaallit Nunaanni innuttaasutut iliuutsitsinnut akisussaaffik tigussavarput. Nunatta piffissami aggersumi ineriartortinneqarnissaa politikerit akisussaaffiginngilaat, tamattali akisussaaffigaarput. Inuup nammineq akisussaaffia pisortat tigussanngilaat, taamaaliunngikkutta inuiaqatigiit pisariaqartitaminnik pitsaasup tungaanut ingerlaartilernavianngilagut, Max Madsen knr.gl-imut oqarpoq.

Politikerit ukiorpassuarni sunik tamanik neriorsuuteqartuarput piviusunngortinngisaannakkaminnik. Taarsiullugu innuttaasut isumasioqqaarnagit inatsisit ilungersunartut inatsisartuni tuaviuullugit akuersissutigisarpaat. Max Madsenip suliniutit angisuut pillugit inatsit akuerineqaqqammersoq assersuutigaa, isumaqarami taanna naalakkersuisut innuttaasut qulaatiinnarlugit akueritissimagaat.

-Partiit qinersisoqartillugu pitsassuarnik isumassarsiaqartarput, tamakkuli amerlanertigut neriorsuutaannaasarlutik. Partii Inuit danskit oqaasiisa Inatsisartuni atorneqaqqusaajunnaarsinnissaat maanna  paasisimavaat, tamannali anguneqanngisaannassaaq. IA ukiorpassuit matuma siorna taamatoqqissaaq politikkikkut periuseqarpoq, qujanartumilli piffissap ingerlanera isumartik allanngortippaat. Innuttaasut ataatsimoorlutik suleqatigiinngippata inuiaqatigiit iluamik ingerlalersissinnaanngilagut, Max Madsen isumaqarpoq.

Attaviitsutut qinigassanngortilluni sassartup qineqqusaarutaani pingaarnertut immikkoortoq alla tassaavoq nunatsinni inuusuttut innuttaasutut pisussaaffilerneqarnissaat. Sakkutuujusussaanertut issaaq, sakkutuujunanili inuiaqatigiinnut iluaqutissartalimmik sulilluni. Taamaaliornikkut inuusuttorpassuat ilinniartitaanikkut katataasimasut siunissamut pitsaanerusumut ilinniartinneqassapput ilatsiinnaratik pisortanit ikiorsiissutinik pisartagaqaannaratik.

-Inuiaqatigiinni assigiinngitsorpassuartigut ikiuisoqarnissaa qujarunneqassaqaaq. Soorlu assersuutigalugu utoqqaat illuini paaqqinnittarfinnilu allani, tassanilu innuttaasutut pisussaaffeqarneq ingerlanneqarsinnaavoq. Taamaaliornikkut aamma suliffissaaleqinerujussuaq iliuuseqarfigisinnaavarput, inuusuttullu sulineq pillugu ilinniagaqassapput immaqalu aamma inuiaqatigiinnit pilersorneqaannaratik tassuuna ilinnialernissaminnut kajumilersinneqarlutik, Max Madsen nassuiaavoq.