Matuersaat naggammik qissallanneqartoq

Qupperneq kingulleq matuneqarpoq, Atuagkanilu piginnittut immikkoortup nutaap Danmarkimi allartinnissaanut piareeqqalluinnarput.
- Taamanikkut eqqarsaatiginngisaannarparput Atuagkat pisiarissallutigu, ukiuni 20-nngulersuni piginnittoq Dorthe Jordening oqarpoq. Assi © : Henriette Simonsen / KNR
januaarip 19-at 2025 10:57

Nuummi illoqarfiup qeqqani atuagaarniarfik Atuagkat pingasunngornermi januaarip 15-iani pisortatigoortumik naggammik ammatinneqarpoq. Atuagaarniarfimmillu piginnittut KNR-imit pingasunngornerup ullaavani oqaloqatigaavut.

Atuagarniarfimmut iserluni nipaalluinnarpoq, atuagaarulluinnaleramilu ini isersimaffigineqartoq akisuavoq. Nuummi sila perserlunilu pitsaavallaanngikkaluartoq, Atuagkat qulinngorluinnalersoq ammarmat inuit isaalerput atuakkallu tuniniarneqartut kingulliit ilaasa misissuataarpaat.

Atuagaarniarfiullu pisortatigoortumik ammanerani ulloq kingulliummat nuannaarneq tussunngunerlu misiginngitsoorneqarsinnaanngillat.

- Ulloq imaannaanngilaq, assut tussunngunarpoq ullup takkunnissaa ernumangikujussimavarput, atuagaarniarfimmi Atuagkani ukiuni 20-nngulersuni piginnittoq Dorthe Jordening tussunngulluni oqarpoq.

Atuagaarniarfik pisortatigoortumik naggammik ammareeraluartoq atuakkat kingulliit tuniniarlugit ammaffissat ullunik arlalialunnik ilallugit, facebookimi quppernerminni allapput.

Kalaallit atuakkiaat piumaneqarluartut

Ilitsiviit imaarulluinnarsimapput. Meeqqanut atuakkat, atuakkat pinerluttulerinermik imallit, nerisassiornermi ilitsersuutit kalaallillu atuakkiaat qangarnitsat danskisullu nutserneqarsimasut sinneruttut kisimik takussaapput.

- Atuakkat qanganittat pissarsiassaajunnaarnikut tassa antikkinngornikut tamakkua aamma soqutigineqartorujussuupput, Dorthe Jordening oqarpoq nangillunilu.

Atuakkat sinneruttut akikillingaatsiarlugit tuniniarneqarput. Assi © : Henriette Simonsen / KNR

Atuakkat akikillingaatsiarlugit naggammik tuniniarneqarput. Taamaammallu pisiniat atuakkat arlallit qaleriiaallugit tunuleriiaattuni utaqqisut takuneqarsinnaapput.

- Massakkut nungulerput aali eqqarsarluta matungutta eqqaarsuaassuugut kisianni taamaattoqanngilaq, imaarutilerpoq akisualerpoq, Dorthe Jordening akileraasitsivimmut qiviallakaajutigaluni oqarpoq.

Iluatsinngitsoq

Atuagaarniarfik Atuagkat 1966-mi maajip tallimaani ammarneqartoq. Ukiuni 59-ini ammareerluni januaarip 15-iani pingasunngornermi naggammik ammatinneqarpoq.

Piginnittut Dorthe aamma Claus Jordening Danmarkimut nuunnissartik pissutigalugu atuagaarniarfik ukiup aappaa avillugu tuniniarsimagaluarpaat.

Tamannali iluatsinngimmat matuinnartariqarlugu aalajangiukkitsik, Claus Jordening natermut isigiutigaluni oqaluttuarpoq.

Aliasunneq nikallunganerlu kisimik misigineqanngillat pisiniammi piginnittullu qungujulallutik illalaarlutillu oqaloqatigiittut takuneqarsinnaapput.

- Aappaatigut aamma nuunnissatsinnut qilanaarpugut uiga iluamik peqqissilluarniassammat, taanna pingaarnerpaatillugu aalajangiussimavarput matuniarluta, Dorthe Jordening oqarpoq.

Piginnittullu nunatsinni kisiartaallutik atuagaarniarfiuteqaramik, siunissami atuagaarniarfimmik ammaasoqaqqikkumaartoq neriutigaat. Namminersortunillu ammaasoqarsimanngippat pisortat atuagaarniarfimmik ingerlatsilersinnaanerat aamma neriuutigalugu.

Atuagaarniarfik pisortatigoortumik maanna matoreersimalerpoq piginnittullu inuunerminni immikkoortup nutaap Danmarkimi februaarip aallaqqaataani aallartinnissaanut piareersaleruttorput.