Matu-p ammaannarnissaa anguniarneqarpoq

Nukappiaqqanik sakkortuumik pissusilinnik ulloq unnuarlu angerlarsimaffiup Matu-p matunissaa pinngitsoorniarlugu Ilaqutariinnermut Inatsiseqarnermullu Naalakkersuisoq Aleqa Hammond iliuusissanik pilersaarusiorniarluni Matup pisortaa Steven Hakesberg ataatsimeeqatiginiarpaa:

Nukappiaqqat sakkortuumik pissusillit angerlarsimaffiata Matup pisortaa, Steven Hakesberg decemberip qulingiluaanni radioaviisimut oqarpoq Matu ullutsinnut tulluukkunnaarmat Matumilu kiffartuunneqartut pisariaqartitaannik tunniussisinnaasut sulisut amigaataammata Matu matussasoq:

Aleqa Hammond oqarpoq Naalakkersuisuninganniit Matup matunissaanik tunngasunik aalajangiisoqarnikuunngitsoq:

- Tusagassiuutitigut paasigatsigu Matu matuneqarniartoq iliuusissamik ujartuiniarluta Matup pisortaa Angerlarsimaffiullu Ajap pisortaa iliuusissanik ujartuiniarluta aggersarsimavavut, Aleqa Hammond oqarpoq.

Aleqa Hammond isumaqarpoq Matu-mi suleriaaseq iluatinnartoq, taamaattumillu suleriusissanik nutaanik ujartuisoqartariaqartoq:

-Matup suliarisai iluatinnartikkatsigit ullutsinnullu tullukkunnaarsimappat tulluussarnissaanut iliuusaasinnaasunik ujartuinissamut ingerlatsisut suleqatiseraavut.

Aleqa Hommond isumaqarpoq Matu nukappiaqqat ajornartorsiutaannik aaqqiiniarluni kivitsisuummat periuseq iluatinnaateqartoq, kisiannili ingerlatiinnarneqarnissaa suli aalajangerneqanngitsoq.

Ilaqutariinermut Inatsiseqarnermullu Naalakkersuisup Matup ingerlatsisuinik januaarip arferngani ataatsimeeqateqassaaq.

Nukappiaqqat sakkortuumik pissusillit angerlarsimaffiat Matu, 1997 - mi Nuummi aalartinneqarpoq.