Matu ingerlaannassaaq

Nukappiaqqanut sakkortuumik ajornartorsiuteqartunut inissiisarfik, Matu Projekt, Nuummiittoq, unittussanngorsimagaluartoq, ingerlaannassasoq, Ilaqutariinnermut Pisortaqarfimmi, ulloq unnuarlu paaqqutarinniffiit pisortaata Gitte Juhl-ip nalunaarutigaa.

- Siornatigut eqqarsaatigisimagaluarparput, Matu projektip ingerlariaasaa allanngorlugu ingerlatitseqqissinnaaneq, aalajangerpugulli Matu-p ingerlaatsini atuinnarlugu ingerlanneqaqqinnissaa. Taama oqarpoq Ilaqutariinnermut Pisortaqarfimmi, ulloq unnuarlu paaqqutarinniffiit pisortaat, Gitte Juhl, nangillunilu: - Sulisussanik nutaanik sisamanik pissaqalersimavugut, naluneqanngitsutullu Matu-mi sulisussaqarniarneq siornatigut ajornartorsiutaasarsimavoq, tassami Matu-mi sulisinnaasut immikkut ittunik pisinnaasallit amigaatigisarsimavavut. Ajornartorsiulli taanna maannakkut qaangerneqarpoq. Matu-p qanoq sivisutigisumik ingerlaannarnissaa naluarput, siumummi takorloorsinnaanngilarput, siunissami meeqqat inuusuttullu qanoq amerlatigisut Matu-miitinneqarnissaat pisariaqartinneqartarumaarnersoq.

- Matumiitinneqartartut tassaapput inuusuttut immikkuullarilluinnartumik pisariaqartitallit, soorlu ulluinnarni aaqqissuulluakkamik, nukinnik assoroorfiusumik paaqqutarinninnermi aaqqissuussineq ingerlatarineqartarpoq, Matumilu sulisut tassaasariaqarput timersorluarsinnaasut. Aamma politikkikkut tapersersorluarneqarpugut, tamannalu qujanarpoq, Ilaqutariinnermut Pisortaqarfimmi, ulloq unnuarlu paaqqutarinniffiit pisortaa Gitte Juhl naggasiivoq.

Matu 1997-ili atuutilermat maannamut nukappiaqqat katillugit 14-it inissinneqartarsimapput.