Mattussisoqarneratigut ataatsimiinnissaq Savalimmiunut nuunneqarpoq
Issittumi Siunnersuisoqatigiit suleqatigiissitaata AMAP-ip, Issittumi nakkutilliinermut nalilersuinermilu siunertanut suliaqartup ataatsimiinnissaanut Nunarput ataatsimiititsisussaagaluarpoq. Tamannali pisussaajunnaarpoq.
Naalakkersuisut Issittumi Siunnersuisoqatigiinni peqataanerminnik, suleqatigiissitat ataatsimiittarneri ilanngullugit, peqataajumajunnaarnerat patsisaavoq. Taamaattumik ataatsimiinneq Savalimmiuni pisussanngorpoq.
Naalakkersuisuni ilasortaq Steen Lynge, Atassut, Sara Olsvigip IA-meersup paragraf 37 najoqqutaralugu apeqqutaanut akissummini allappoq, Issittumi Siunnersuisoqatigiinni peqataasarnerit tamarmik, suleqatigiissitaliat ataatsimiittarneri ilanngullugit unitsinneqarallartut.
Taamaattumik ataatsimiinneq Nunatsinni pissanngitsoq, Naalakkersuisut aalajangigarigaat.
Issittumi Siunnersuisoqatigiinnut tunngasuni ataatsimiinnerit suut ukiormanna pisussaanersut, Sara Olsvigip aamma apeqquteqaatigaa. Tamatumunnga atatillugu Steen Lynge akissuteqarluni allappoq, Issittumi Siunnersuisoqatigiit isumagisassaattut suliassanut aningaasaliissutigineqartartut killeqarallartillugit, Namminersorlutik Oqartussat suliniutinut tamanut malinnaanissamut periarfissaqanngitsut.
Issittumi Siunnersuisoqatigiit aaqqissuussaannik ataatsimiinnissat tamarmiusut takussutissartaannik Sara Olsvig pissarsiniaruni, Issittumi Siunnersuisoqatigiit allattoqarfiannut saaffiginninnissaanik Steen Lyngep innersuuppaa.
Taamaattorli Steen Lyngep erseqqissarpaa, Issittumi Siunnersuisoqatigiinni sulinermi sunniuteqarnerulernissaq suliniutigineqarmat.
- Kalaallit Nunaata Issittumi Siunnersuisoqatigiinni sunniuteqaqataasarnissaata siunissami qulakkeerneqarnissaa, unitsitsigallarnermi siunertarineqarpoq, Naalakkersuisut siulittaasuata tullia Steen Lynge akissummini taama allappoq.