Mattussisoq suliunnaarallartinneqarpoq

Angut inuusuttoq Qaqortumi Pisiffimmi sulisoq suliunnaarallartinneqarpoq, meeqqamik qulingiluanik ukiulimmik qerititsivimmut mattussisimanini pillugu.
Allattoq Najaaraq Egede
novembarip 16-at 2007 10:26

KNI Pisiffik A/S nukappiaqqamut qulingiluanik ukiulimmut ilaqutaanullu utoqqatsissummik nassiussivoq, taama ilisimatitsivoq Per Steen Larsen, Sisimiuni tuniniaanermut pisortaq.

- Ilaqutariinnut allakkanik nassiussaqareerpugut, taakkulu pisimasoq pillugu ajuusaarnitsinnik imaqarput, oqarpoq.

Nukappiaraq qulingiluanik ukiulik Qaqortumut feeriartilluni Pisiffiup pisiniarfeeraata SPAR kujalliup eqqaani meeraqatinilu pinnguartillutik meeraqatai igalaanut sapaatiummat unnulaartoq kasuttoqattaarsimapput. Sulisut taamaaliorneq nuannarinagu meeqqat ilaat tigusaraat, tassaavorlu nukappiaraq ualiummalli uumisaarinermut tunngatillugu sianigisaqanngitsoq.

Nukappiararlu pinaakkaluartoq qerititsivissuarmut qulleqanngitsumut sulisut parnaarussimavaat, tassaniissimallunilu minutsini pingasuni.

- Pisiniarfitsinni taamaaliortoqartussanngilaq, taamaattumik nukappiaqqamik mattussisoq suliunnaarallartipparput, taamaattumillu suliaq paasiniarlugu naammassineqareerpat aatsaat sulileqqissinnaassalluni, Per Steen Larsen oqarpoq.

- Neriuppugut aamma pisiniarfiit ingerlatatta arlaannaannaanniluunniit taama pisoqaqqissanngitsoq, naggasiivoq.

Qaqortumi politiit angajoqqaat pisiniarfimmi pisimasoq pillugu unnerluutiginninnerat paasiniarlugu aallarteruttorpaat - nukappiaraq, meeraqatai pisiniarfimmilu sapaammi unnukkut sulisut - oqaloqatigalugit.

- Paasiniaanivut naammassigutsigit politimestereqarfimmut innersuussuteqassaagut. Naatsorsuutigaaralu ilaatigut nukappiaqqamik kiffaanngissusiiaasimanermut tunngasumik unnerluutiginnittoqassasoq, Qaqortumi politeeqarfiup pisortaa Jack Nathansen oqarpoq.

Nukappiaraq qulingiluanik ukiulik ilaqutaalu Narsarsuarmut maanna utersimalerput.

Anaanaasoq Martha Isbosethsen oqarpoq ernertik suli assut sinnarluttartoq, unnukkut kisimiissinnaaneq ajortoq allaallu tutittariaqartartoq. Taamaammat Narsap Kommuneanut ikioqqullutik qinnuteqarsimapput akuerineqarpullu psykolog-imik oqaloqateqarnissamut.

- Narsamukassaagut ernerput psykologimik oqaloqateqartikkiartorlugu, sapaatiuppallu aallassaagut, anaanaasoq oqarpoq.

Ilaqutariit aamma Pisiffimmit attavigineqannginnertik ajuusaarutigaat.

Pisiffiup qullersaqarfianit Per Steen Larsen oqarpoq allakkiornissartik toqqarsimallugu, maannalu allakkat kalaallisut nutserneqareerlutik nassiunneqarsimalersut.