Mattussineq suliunnaarsitsinermik isumaqarpoq

Taamatut isornartorsiuineq Air Greenlandimit tusaaniarneqarpoq, sulisoqarnermut pisortaq Mads B. Christensen oqarpoq, nassuiaatissaqartorlu oqaatigalugu.

- Isornartorsiuineq tusaatissatut tigusariaqarpara. Mattussinerli suliunnaarsitsinermik isumaqarpoq. Soorlu atisat sullisit uterteqqusarigut, taava suliffimminnut atatillugu inigisaat aamma suliunnaarunik qimassavaat, Mads B. Christensen Air Greenlandimeersoq oqarpoq.

Timmisartortartut katuffianni Flyvebranchens Personale Unionimi siulittaasoq, Per Fallentin, ippassaq radioaviisimut oqarpoq timmisartortitseqatigiinnik taama siorasaarisunik naammattoorsinikuunngisaannarluni.

Mads B. Christensenili naapertorlugu taama pisoqarnera nassuiaatissaqarpoq.

- Timmisartortitseqatigiit allat timmisartortartuminnut inissaqartitsineq ajorput, meeraannullu meeqqerivissaqartitsineq ajorlutik. Tamanna allanit allaanerussutigaarput maanili nalinginnaasuuvoq, Mads B. Christensen nassuiaavoq.

- Timmisartortartut suliumajunnaassappata ilaqutaannut meeraannullu eqquinerlussinnaanera oqaaseqarfigerusunngilara. Aaqqiissutissamik suliumajunnaartoqannginnerani ujarlerusunneruvunga, Mads B. Christensen oqarpoq.

Air Greenland timmisartortartut januaarip sisamaani naapinnissaannut aaqqiissutissanillu ujartueqatiginissaannut akuersaarsimavoq. Mads B. Christensenillu neriuutigaa, naapinneq naapinnernit siullernit pitsaanermik angusaqarfiujumaartoq. Neriupporlu timmisartortartut angusaqarniarnerullutik isumaliussasut. Naapeqatigiinnermi aningaasanik sipaarfissanik nassaarsinnaanissaq Air Greenlandimit neriuutigineqarpoq.

Timmisartortartut Air Greenlandip isumaqatigiinniutaannut akuersaarpata, timmisartunut ilaasartut akikinnermik timmisartorsinnaalissasut Mads B. Christensenip neriorsuutigaa.

- Unammillersinnaanerput pitsanngorsassallugu anguniagaqarpugut, amerlanerillu timmisartutsinnut ilaasalersinniarutsigit billetit akikinnerutittariaqassavagut, Mads B. Christensen oqarpoq.