Mattussineq atorunnaarpoq

Qaqortumi ulloq unnuarlu angerlarsimaffimmut ”Illu Paarsivik”-mmut Perorsaasut Ilinniarsimasut Peqatigiiffiata, PIP-p, atorfinnik mattussiniarnera marlunngormat oktobarip 31-anni ulloqeqqaanerani ilanngutassiaraarput.

Tassani apersorneqarpoq PIP-p siulittaasua Kaaliina Skifte. Oqarpoq ”Illu Paarsivik” isumaqatigiinniuteqarfiginiarlugu saaffiginnittarsimagaluarnitik iluatsinngimmata, tassunga atorfininniartunut mattussissamaarlutik aalajangersimallutik.

Illu Paarsivimmi allaffissornermut aqutsisoq, Tommy Hansen, ulloqeqqanut radioaviisip kingorna qisuariaateqarpoq, isumaqatiginninniarnissaq tunngavigalugu PIP-mut saaffiginnilluni.

- Tommy Hansen saaffiginnereersorlu PIP-p atorfinnik mattussiniarnera atorunnaarsinneqarpoq, PIP-p siulittaasua Kaaliina Skifte oqarpoq, nangillunilu:

- PIP-miit asuliinnaq atorfinnik mattussinavianngilagut, soorunalimi peqqutissaqarluarutta mattussineq aatsaat atussavarput, tunngaviusumik isumaqatigiissummiittut sulinermut unitsitsisinnaanermut maleruagassat tunngavigalugit, tamannalu Illu Paarsivimmut atorsimavarput, qaammatit arfineq-pingasut tusarnikuunnginnatsigik, isumaqatigiissummik sananissaq eqqarsaatigalugu.

Illu Paarsiviup PIP-llu akornanni isumaqatiginninniarnerit aallartimmata mattussineq maanna atorunnaarsinneqarpoq.