Matoqqasuni parnaarussivimmiilersussat sungiusarneqartarput
Nunatsinni parnaarussivik matoqqasoq siulleq pilersaarutit malillugit 2012-imi atorneqalissaaq.
Parnaarussivimmi Herstedvesterimiittumi ukiut 14-issaat siunnersuissartuusoq, Juliane Lange, isumaqarpoq, piareersaatissat imaannaanngitsuussasut.
- Maaniipput kalaaleqativut ukiut arlalippassuit inissinneqarnikuusut – taakku eqqarsaatigissagutsigik pingaaruteqartorujussuuvoq siunissami piareersimaffigissallugu, angerlartinneqarnerini pinerluuteqarsimasunik nakutilliisoqarfik suleqatigalugu, komunuip qanoq-uku ikiorniarai, Juliane Lange oqarpoq.
Parnaarussat inuiaqatigiinniit ukiorpassuit avissaartitaasimasut inuiaqatigiit ulluinnarni inooriaasaat nalinginnaasoq nalulersimasarpaat. Taamaammat Danmarkimi ukiorpassuarni parnaarussaasimasut inuiaqatigiinnut arriitsumik akuliutsikkiartuaarnissaat aaqqissuunneqartarpoq. Pineqaatissinneqarsimasut isertitsivinnut ammasunut siullermik inissinneqartarput, suliffissarsiuunneqarlutik imaluunniit ilinniarnissaminnut siunnersorneqarlutik. Kingornatigut inissianut pensionatinik taaneqartartunut, tassa ulloq unnuarlu paaqqinniffiusunut, inissinneqartarput.
- Suleqateqartarpugut piareersimasussanik, inissinneqartussat sungiusarniassammassuk parnaarussivinnut matoqqasunut inissinneqarnissartik. Matoqqasunimi pissutsit allaanerujussuupput, kikkulluunniit imaaliallaannarlutik pulaarsinnaanngillat, imaaliinnarlunilu isertoqarsinnaanngilaq. Taamaammat matoqqasuniilersussat sungiusarneqartarput qanoq ilillutik akuliukkunik pitsaanerussanersoq, siunnersorneqartarput, sulissunneqartarput ingerlalluarnissaat siunertaralugu, Juliane Lange oqarpoq.
