Danmarkimi aningaasanut inatsisissatut siunnersuut milliardit sinnerlugit sinneqartoorfiusussaavoq, taakkulu ilaminiinnanngui Kalaallit Nunaanni matoqqasumik parnaarussiveqalernissamut atorneqarsinnaagaluarput. Taamaaliortoqaraluarpat, sanaartornermut aningaasartuutit tassunga atorneqartut, aningaasanut inatsimmut ukiumi ataatsimi tamanna aamma artukkiinavianngikkaluarpoq.
Taama isumaqarput Atlantikup Avannaani Suleqatigiit. Aningaasanut danskit inatsisissaanni oqaaseqartarnerminni Kalaallit Nunaanni eqqartuussiveqarneq taakku sammivaat.
- Kalaallit Nunaanni eqqartuussiveqarneq, Namminersornerullutik Oqartussanut suli nuunneqanngitsoq, naliliinerit naapertorlugit Danmarkimi Jyllandimi Qeqertanilu akuerineqarnavianngilluinnaraluarpoq, tassa taama appasitsigaaq, Atlantikup Avannaani Suleqatigiit ilaatigut allapput, allakkallu nangipput:
- Danmarkimi inatsisinik atortitsinermut ministerimut Kalaallit Nunaanni Naalakkersuisut qangali saqqummiussereeraluarput, arlalitsigut pitsanngorsaatissanik assigiinngitsunik kissaateqarlutik, pitsanngorsaasoqaraluarpammi Kalaallit Nunaanni eqqartuussiveqarnikkut atugassarititaasut Danmarkip sinneratulli pitsaatigilissagaluarput.
Aningaasanut Danmarkimi inatsisissaq isumaqatigiissutiginiarneqalerpat isummersuutit ilanngunneqassasut, Atlantikup Avannaani Suleqatigiit neriuutigaat.
