Neriniartarfiit, imerniartarfiit akunnittarfiillu aaqqissuussinerni matoqqasuni sapaammit sisamanngornermut ullaakkut sisamat tungaanut imigassallersinnaalissapput.Assi: KNR / Malik Brøns

Matoqqasumik aaqqissuussinermi ullaakkut sisamat tungaanut imigassallertoqarsinnaalissasoq

Apersortittoqarnerani akkat piffissami sivisunerusumi aliikkusersuisinnaalingajalerpoq.

Demokraatit Inatsisartunut ilaasortaatitaata, Malene Vahl Rasmussenip siunnersuutaa akuerineqarpoq.

Siunnersuut Naalakkersuisut imigassaq pillugu inatsimmut, maanna atuuttumut allannguutissamik Inatsisartunut siunnersuuteqarnissaannut tunngavoq.

Neriniartarfiit, imerniartarfiit akunnittarfiillu aaqqissuussinerni matoqqasuni sapaammit sisamanngornermut ullaakkut sisamat tungaanut imigassallersinnaalissapput.

AAMMA ATUARUK Amerlanerussuteqartut allanngortikkusukkaat

Apersortittoqarnerani, akunnaalliliisoqarnerani, katittoqarnerani, peqatigiiffiit nalliuttorsiornerini, siulersuisut ataatsimiinneranni, Inatsisartunut qinersinermi, kommunimut qinersinermi allanilu nalliuttorsiornerit aaqqissuussinerit matoqqasuusut siunnersuummi allassimapput.

Naalakkersuisut Inatsisartut taasissutigisassaannik siunnersuummik maanna pitsanngorsaasussanngorput.

Taamaaliortoqarnissaanullu sapaammiit sisamanngornermut nalunaaqutaq 24.00-ip tunganut taamaallaat sassaalliuteqartoqarsinnaavoq.

Imigassamut inatsit qasukkarneqartoq

Imigassaq pillugu inatsit qasseeriarluni allanngortinneqarpoq.

Siunnersuutit sisamat Inatsisartunit 2018-imi akuerineqarput. Siullermik pisiniarfiit imigassamik assersueqquneqarput – inatsit taanna allanngortinneqarlunilu atorunnaarsinneqarpoq.

AAMMA ATUARUK Imigassaq pillugu inatsit sukannerpallaarunnaassaaq

Imigassamik nioqquteqartarnermut inatsit ukiorpassuarni ataasinngornermiit tallimanngornermut 9.00-18.00-mut arfininngornermilu 10.00-14.00-mut nioqquteqarsinnaatitaaffiusup piffissai sivitsorneqarput, imigassallu kimittuut ataasinngornermit arfininngornermut 10.00-imit 20.00-imut pisiarineqarsinnaalerlutik.

Inuusuttut 18-iliineqanngitsut 2018-ip siornatigut sumiiffinni imigassallerfiusuni angajoqqaaminik nakkutiginnittumilluunniit ilagisaqartinnatik nalunaaquttap 20.00-ip kingorna najuuteqqusaasimanngikkaluarput.

Inatsit taanna allanngortinneqarpoq, inuusuttullu angajoqqaaminnik nakkutiginnittumilluunniit ilaqartigatik sumiiffinni taakkunani nalunaaqutaq 23.00 tikillugu isersimasinnaalerlutik.

Imigassaq pillugu ussassaaruteqartarnerit tamarmik aamma inerteqqutaaleraluarput, inatsilli taanna aamma allanngorteqqinneqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat