Washington: Matoqqatitsineq Sinniisoqarfimmut sunniuteqalersoq
USA-mi pisortani sulisut 800.000-it eqqorneqarput, affaat sinnilaarlugit sulisupput sulilu akissarsinatik - sinnerilu sulinngiffeqartinneqarallarlutik, Washingotonimi qitiulluinnarpoq ularpaafiullunilu, Kalaallit Nunaata Washingtonimi Sinniisoqarfiani pisortaq, Inuuteq Holm Olsen KNR-imut oqarpoq.
- Washingtonimi tamanna malunniuteqartorujussuuvoq, tamaani amerlasuut naalakkersuisunikkut suliartuugamik, soorlu ataatsimiinnisaraluit kinguartinneqarput, massakkullu utaqqiinnaleqqavugut taamaattumik uagutsinnut malunniuteqarpoq, Washingtonimi sinniisoqarfimmi pisortaq Inuuteq Holm Olsen taama oqarpoq.
Innuttaasut eqqorneqartut akerliussutsimik takutitsisut takussaaleriartortut, Inuuteq Holm Olsen oqaluttuarpoq.
- Aningaasarsiornikkut eqqorneqartut malunnartupilussuupput, taamaattumik akerliussutsimik takutitsisut illoqarfinni assigiinngitsuni sivitsoriartornerani takussaaleraluttuinnarput, Inuuteq Holm Olsen nassuiaavoq.
Qarmarsualiornissaq akimmisaarutaasoq
USA-mit Mexicop Killeqarfiani qarmarsualiornissaq 37 milliardit koruuninik akeqartussaasoq, præsidentip sukataarutigiuarsinnarpaa, Demokraatillu aningaasaliiumannginnertik aalajangiusimajuarsinnarpaat.
- Naalakkersuisoqarfiit ammaqqinneqarnissaannut aningaasaliisoqarnissaanullu isumaqatiginniarnerit aallarteqqissanersut isumaqatigiittoqassanersorluunnit oqaatigiuminaatsorujussuuvoq, neriuppugulli isumaqatigiikkumaartut, sivitsoriartorneranimi uagut sulitsinnut sunniuteqarpoq, Kalaallit Nunaata Washingtonimi Sinniisoqarfiani pisortaq, Inuuteq Holm Olsen oqarpoq.
