Matoorussaanikut pingasut siulliit angerlarput

Napparsimavimmit uninngaffigisaannit animmata, tusagassiortunit politiinit takuniaasunillu qiimasunit naapinneqarput, kingorna angerlarunik saniliminnit ikinngutiminnik tikilluaqquneqartussaallutik.

Qaarusummi sulisut ilaat 52-inik ukiulik, Juan Illanes, qaqinneqarnermi kingorna suli tupigusuppoq, nammineq oqarnera malillugu suli uppererpiarnagu annaanneqarnertik. Qaarusummi sivisuumik matoorussaaqqasimanerminni inuunerup killissaa tikillugu misigisimallugu nassuerutigaa.

Qaarusumi sulisut annaanneqartut sinneri 30-it napparsimavimmi suli misissugaapput ajoquserneri annikitsut passunneqarlutik.

Napparsimavimmi misissugaasut ullumi tallimanngornermi angerlarnissaat naatsorsuutigineqarpoq, imaluunnit sapaatip akunnerata naanerani, napparsimavimmi misissortiffigisaani nakorsaq taamatut oqarpoq.

Annaanneqartut amerlarnersaat ilimagisamit peqqipput, naak qaammatit marluk sinnerlugit qaarusummi taartumi, kiattumi isugutattumilu matoorussaaqqareerluarlutik.

Ilaat annikitsunik amimikkkut ajoquserput, ataaseq puammigut aseruuttoorsimavoq, arlaqartullu kigutiminnik ajornartorsiuteqarput.

Timimikkut peqqipput, taamaattorlu tarnimikkut atugaat qanoq issanersoq eqqoriaruminaattoq, napparsimavimmi Copiapo-mi pisortap tullia oqarpoq.