Kulturi

Matissep eskimuut kiinaannik titartagai saqqummersinneqartut

Frankrigimiup eqqumiitsulianik qalipaasup nunarsuarmi tusaamaneqartup Henri Matissep suliai, Københavnip avatinnguani eqqumiitsulianik katersugaasivimmi Ordrupgaardimi saqqummersinneqarput.

Allattoq Karsten Sommer

aggustip 31-at 2015 04:54

Nutserisoq Simon Uldum -

''Matisse og eskimoerne' (Matisse eskimuullu, aaqq.), saqqummersitsineq taama qulequtaqarpoq. Eskimuullu eqqumiitsuliaat, pingaartumik kiinarpalialiaat, aallaavigalugit Henri Matissep utoqqalereerluni suliai arlallit saqqummersinneqarput.

Henri Matisse, 1869-imi inunngorpoq 1954-imilu toqulluni. Utoqqaligami timikkut innarluuteqalerpoq eqqumiitsuliorniarneranik killiliisumik. Taamaammat piuminarnerusunik qalipaanissani soqutiginerulerpaa.

Ningaava Sorsunnersuup Aappaata nalaani New Yorkimiinnermi eskimuut kiinarpalialiaannik arlalinnik pisisimavoq, taakkulu Matissep soqutigalugit eqqumiitsuliaminut isumassarsiorfigisimavai.

Knud Rasmussenip oqaluttuai alutorisimavai

Matissep Knud Rasmussenip angalanilersaarutai aamma atuarpai eskimuullu kiinaannik assilisai kusanarluinnartut nammineq titartakkaminut isumassarsiorfigalugit.

Knud Rasmussenillu issittormiut qanoq pissuseqarnerannik ulluinnarnilu inuunerannik oqaluttuai Matissep alutorsaatigisimavai.

Ordrupgaardimilu saqqummersinneqartut arlallit alutorinninnerata inernerai.

Saqqummersitsineq novembarip 29-ata tungaanut takuniarneqarsinnaavoq.

Immaqa eqqumiitsuliai Nunatsinni saqqummersissallugit aamma soqutiginarsinnaasoq?