Mathæussenip ilaasortaajunnaarnera eqqissiviilliuutaavoq

Inatsisartut ataatsimiinnerat suliluunniit aallartilluanngitsoq partiit naalakkersuisoqatigiit akornanni eqqissiviilliortoqalerpoq.

Lars Mathæussenip Partii Inuit qimallugu Siumumut ilaasortanngorpoq.

Partiip siulittaasua, Nikku Olsen, Inatsisartuni ilaasortaanissaminut naleqqutinngitsutut upernaaq nalilerneqarmat, Lars Mathæussen sinniisutut ilaasortanngorpoq, Randi Broberg peqatigalugu.

Lars P. Mathæussen 143-nit taaneqarluni Partii Inunni siullertut sinniisussanngorpoq, taamaammallu Partii Inuit ilaasortaatitaannut marluusunut ilanngulluni.

Inatsisartuni Ilaqutariinnermut.Peqqissutsimullu ataatsimiititaliami siulittaasutut toqqagaaqqammerpoq, Inatsisartut Kukkunersiuinermut- Eqqissisimatitsinermut Avatangiisinullu ataatsimiititaliaanni aamma ilaasortaalluni. 

Naalakkersuisoqatigiit siulittaasuisa, unnuaq unnuap-qeqqariitsiartoq tusagassiortunut nalunaaruteqarnerminni, Lars Mathæussenip Siumumut ilaasortanngornera uppernarsarpaat.

- Partii Inunnut ilaasortaanera maannamut ajunngivissimavoq. Naalakkersuisoqatigiinnermili suliat tunngaviusut pissutigalugit Siumumut nuunnissara aalajangiuppara, misigigakkumi politikkikkut Siumumut qaninnerullunga, Naalakkersuisoqatigiit siulittaasuisa tusagassiortunut nalunaarutaanni, Lars P. Mathæussen oqarpoq.

Sooq Partii Inuit qimallugit Siumumut nuunnersoq, Lars Mathæussen Radioaviisimit aperigatsinni siullermik ima akivoq.

- Tunuarninnut pissutaasinnaasumik maanna oqaaseqarsinnaanngilanga, Naalakkersuisooqatigiit siulittaasuisa nalunaarutaat innersuussutigiinnassavara, Lars Mathæussen oqarpoq.

Partii Inuinnut ilaasortaajunnaarnermini suna pissutigalugu tunuarnini qaquguluunniit oqaluttuariniarnagu, Lars Mathæussenip radioaviisimut oqaatigaa.

Partii Inuit siulittaasuat, Nikku Olsen pisoq pillugu oqaaseqarumanani Radioaviisimut oqarpoq.