Mathias Storchip manuskriptiliaa nalitooq nunatsinnut utertinneqassaaq
Arktisk Institutti ullumi ukiunik 60-inngortorsiorpoq, tassungalu atatillugu instituttip allagaatinik toqqorsiviata allagaatinik Kalaallit Nunaanniittariaqaraluartunik ukiuni pingasuni misissuinera aamma naammassineqarluni.
Arktisk Instituttip nalliuttorsiornini Københavnimi Nunatta Sinniisoqarfiani ualeru tunniussinermik malunnartinniarpaa.
Nunatta Katersugaasiviani sulisoq Danmarkimilu allagaateqarfissuarmi sulisoq Arktisk Instituttip katersarpassuini allagaatinik misissuisimapput, toqqorsivimmilu Nunatsinniittariaqartut arlallit nassaarisimavaat. Peqatigitillugu allagaatit siunissami digitalinngorlugit pigineqarsinnaasunngorlugit scannerneqarsimapput.
Immikkullu illuinnartumik Arktisk Institutip Sinnattukkap allaqqaarnerata nunatsinnut utertinneqarnissaa kulturikkut pingaarutilinnut tunngasunut ataatsimiititaliamut qinnuteqaatigisimavaa. Sinnattugaq tassaavoq nunatsinni oqaluttualiamik atuakkiat siullersaat, inuiaqatigiinnik pissutsinik nunatsinnilu ilinniarsimassutsikkut qaffasissutsimik sakkortuumik isornartorsiuiffiunerminik maluginiarneqarsimasoq.
Arktisk Instituttip naliliinera naapertorlugu Sinnattukkap allaqqaarnera nunatsinniittariaqarpoq, tassanimi allanneqarsimammat, toqqorsiviup pisortaa Lisbeth Valgreen taama ilisimatitsivoq.
Nunatta Katersugaasiviata atuakkap allaqqaarneranik tunniussineq Sinnattukkap juunip 20-anni ukiunik 100-nngortorsiorneranut atatillugu nalliuttorsiutiginiarpaa.
