Mathias Storchip atuarfia atuarfitsialattut toqqagaavoq
Meeqqat ineriartornermikkut akornutillit atuarfiat Ilulissaniittoq Mathias Storch-ip atuarfia ukiumoortumik nersorinninniarluni tunniunneqartartumik atuarfitsialattut toqqagaavoq.
Mathias Storchip atuarfianut nersorinninnissamut toqqaasuuvoq Ilinniartitaanermi naalakkersuisoq Doris Jakobsen.
Taama nersorinninnermut tunngavilersuutigineqarpoq immikkut ittumik atuarfiup taassuma atuartitseriaatsimigut atuartut ataasiakkaat piginnaasaat pisariaqartitaallu tunngavigalugit atuartitseriaaseqartarsimanera. Taamaalilluni tamanna atuartunut imminut tatigilersitsisarmat taamalu ulluinnarni atuartut nammineersinnaanerulernerannik kinguneqartarluni.
Atuarfitsialattut ukiumut allagartaq nersornaatisiarineqartartup saniatigut checki 10.000 koruuninik imalik aammattaaq tunniunneqassaaq. Atuarfiup pisortaa Johanne Olsen oqarpoq, aningaasat sulisut nammineq sumut atussanerlugit aalajangissagaat.
Taanna aamma erseqqissaavoq ilinniartitsisut pikkorilluartut misigissuseqarluartullu suliffimminnut tunniusimalluarlutik sulisorineqarnerat pissutaalluni atuarfik taama ingerlalluarsimasoq.
