Mathias Storchimi 10. klassit assigiimmik periarfissinneqarusupput

Allattariarsorluni oqaatsinut fagini soraarummeerutaasumik misilitsittussaanerminnut atatillugu, Atuarfik Mathias Storchimi atuartut soraarummeertussat paasitinneqarsimapput, allattariarsorluni misilitsittussaanerminni qarasaasiaq atorlugu allallutik misilitsissinnaassanngitsut. Taama periarfissaqartinneqartussaannginnertik assigiinngisitsinertut nalilerpaat, tassami Nunatsinni atuartut allat soraarummeernermut atatillugu qarasaasiamik atuisinnaatitaasut, Atuarfik Mathias Storchimi atuartut 10.A-meersut tusagassiuutinut ilaatigut taama allapput.

- Påskeferie sioqqutitsiarlugu paasitinneqarpugut ukioq manna Atuarfik Mathias Storchimi atuartuusugut soraarummeerutaasumik misilitsinnermi tamanna periarfissaq piginatigu. Tamanna akuerinngilarput, atuartut allapput, nangillutillu:

- Angajoqqaagut peqatigalugit atuarfiup pisortaanut skolebestyrelsilu ilanngullugu allakkatigut saaffiginnissutigivarput, akineqaannarlutali teknikkikkut peqquteqartumik ukioq manna soraarummeertussaasugut qarasaasiaq atorlugu allassinnaanermut periarfissaqartitaanngitsugut, 10.A-meersut allapput.

Soraarummeerutaasumik misilitsinnissartik ilisimaneqareermat teknikki utoqqatsissutiginagu piareersarfigineqarsimasinnaagaluartoq, Atuarfik Mathias Storchimi atuartut 10.A-meersut oqarput.

Atuarfiulli pisortaanut atuarfiullu siulersuisuinut saaffiginninnerit maannamut iluaqutaasimanngillat, soorlu aamma kommunalbestyrelsimi ilaasortanut saaffiginninnerit aamma kinguneqarsimanngitsut:

- Nunatsinni atuartut allat assigalugit soraarummeerutaasumik misilitsinnermi assigiimmik periarfissaqarusuppugut. Atuarfik Mathias Storchimi atuartuusugut sutigut tamatigut eqqugaareersugut, suli qaavatigut eqqugaaqqippugut. Kikkunukua atuartuusugut ikiorniaraatigut, Atuarfik Mathias Storchimi 10.A-meersut naggasiillutik aperipput.