Matematikkimut piginnaasat annikippallaarput
Naak nalunaarusiaq suli saqqummiunneqanngikkaluartoq, taamaattoq arlalinnit naatsorsuutigineqarpoq, paasiniaanermi paasisat kusanarpiarnavianngitsut, tassami atuartut, ingammik matematik-imut piginnaasaat, pitsaviunngitsut ilisimaneqareermat.
Atuartut matematik-imut piginnaasaasa paaniarneqarnerata inerneri, Inerisaavimmit maanna suli oqaaseqarfigineqarusunngikkaluartut, taamaattoq Inerisaaviup pisortaata, Jens Jakobsen-ip oqaatigaa, Inerisaaviup kommuninik suleqateqarlutik pitsannguutissanik ujartuilereerlutik.
- Taamaaliornikkut kommunit namminneq pingaartitatut ineriartortitassatik aallaavigalugit paasissutissanik katersinerisa kinguneranik kisitsisit pigilikkavut aallaavigalugit ineriartortitsissaagut, aamma ilinniartitsisut ilinniaqqinnerisa kingorna, soorlu kandidatitut, taakku ilinniartitsisoqatiminnik ineriartortitsinissaat tunuliaqutigalugu pitsanngorsaanerit aallartittussaavagut, Inerisaaviup pisortaa, Jens Jakobsen taama oqarpoq.
Ukiuni kingullerni atuartut piginnaasaat kisitsisinngorlugit suli saqqummiunneqanngikkaluarput, taamaattoq radioaviisimit ilisimavarput atuartut annerit 20 procentiisa matematik artorsaatigisaraat, soorlu aamma 2010-mi nalunaarusiami tamanna atuarneqarsinnaasoq. Taamaattoqarnera aningorniarlugu Inerisaavik nalilersuisussanngorpoq Atuarfitsialak qanoq ingerlasimanersoq, Jens Jakobsen oqarpoq.
- Paasissutissanik maanna peqalerpugut taamaalilluta atuartut 3. klasse-mi, 7. klasse-mi 10.klasse-milu angusarisaat malinnaavigisinnaalerlutigit, taamaalilluta atuartut aappaagu angusariumaagassaannut nallersuussisinnaalissalluta, taamaattumik taamanikkussamut erseqqarissumik nalilerneqarsinnaalissaaq Atuarfitsialak qanoq ingerlasimanersoq, Inerisaaviup pisortaa, Jens Jakobsen taama oqarpoq.
Atuartut piginnaasaasa paasiniarneqarneranni, Qaasuitsup Kommunea Inerisaavimmit suleqatigineqarpoq. Qaasuitsup Kommuniani anguniarneqarluni, 7. klassini atuartut qallunaatut oqaluttariarsornermi matematikkimilu angusarisartagaasa pitsaaninngortinneqarnissaat ukioq 2016 nallertinnagu.
