Mary Simon: Nuannaaqaanga!
- Ukiut amerlaqisut sulissutigereerlugu nuannaaqaanga Canadap naalakkersuisuisa Inukjuarmi najugaqarsimasut pisortatigoortumik utoqqatserfigimmatigik.
Pisortatigoortumik utoqqatsertoqarnerani oqalugiarnermi eqqugaasimasut akornanni misigissutsit qaffakaanerat malunnarpoq. Uanga misigissutsikkut attortippunga, utoqqatsertoqarnerali aamma nuannaarutigalugu.
- Ilaqutariit utoqqatserfigineqartut utoqqatserfigineqareernermik kingorna Canadami naalakkersuisunut suleqataanerulerusupput. Inuiaqatigiinni sullitassatigut, soorlu peqqinnissakkut, ilinniartitaanikkut, tarnikkullu pitsaanerusumik inuuneqalernissamut suleqataalerusupput. Pinngitsaalisaalluni nuutsitaasimaneq suli ullumikkut malugineqarsinnaammat utoqqatsertoqareernerata kingorna maannakkut siumut ingerlariaqqinnissaq kissaatigilerpaat.
- Canadami naalakkersuisut aappassaa Inunnut utoqqatserput. Ukiut marluk qaangiupput atuarfeqarfiit utoqqatserfigineqarmata, maannakkullu pinngitsaaliissummik nuutsitaasimasut utoqqatserfigineqarlutik. Ilimagaara inuit eqqugaasimasut utoqqatserfigineqarnertik iluaqutigissagaat, taamaalilluni inuunerat aaqqissuunneqaqqissinnaalissammat. Aamma utoqqatserneq siumut aallariarnissamut iluaqutaassangatippara.
- John Amagoalik utoqqatserfigineqareernermi kingorna nuannaarpoq. Una misigisimasaat misigissutsikkut attuisimaqaaq, oqalugiarnermi aamma pinngitsaalisaallutik nuutsitaasut aqqi taagorneqarmata John Amagoarlik killitsissimalluni.
- Isumaqarpunga Kalaallit Nunaat qanoq pisoqarnissaanut Danmarkimik isumaqatiginninniartariaqartoq. Uanga naluara Danmarkimi naalakkersuisut isumaqarnersut Kalaallitt utoqqatserfiginissaannut piffissanngunnginnersoq. Canadami pisimasut Kalaallit Nunaanni pisimasunut assingusorujussuupput, Canadamiut utoqqatsernerat ilimagaara nunanut allanut ilinniutaasoq.