Mary Simon neriuppoq

oktobarip 04-at 2006 07:57

Nunap inoqqaavi pillugit Naalagaaffiit Peqatigiinni aalajangersakkamut, Canadami nunap inoqqaavisa naalakkersuisut allatut isummertissinnaassagaat, Inuit Tapiriit Kanatami siulittaasup, Mary Simonip, neriuutigaa.

Nunap inoqqaavisa pisinnaatitaaffii pillugit Ottawami ataatsimeersuartoqarmat Mary Simon oqalugiarami taama oqarpoq.

Canadami naalakkersuisut konservativiusut Naalagaaffiit Peqatigiinni aalajangersakkamut ilisimaneqartutut akerliullutik taasipput, aalajangersagaq inatsisinut tunngaviusunut naapertuuttuunnginnerarlugu.

Canadap tunngaviusumik inatsisaanut Naalagaaffiit Peqatigiinni aalajangersakkap aamma Canadap inuit pisinnaatitaaffii pillugit aalajangersagaanut, naalakkersuisut sutigut akerliunersut uppernarsaaqqullugit Mary Simonip kajumissaarpai.

Canadami naalakkersuisut nunallu inoqqaavi siornatigut suleqatigiinnermikkut nutaanik pilersitsisarsimasut Mary Simonip aamma erseqqissarpaa. Tamakkununnga ilaavoq Canadami inatsisini tunngaviusuni nunap inoqqaavisa pitsaanerusumik inissisimalernerat. Taamaattumik suleqatigiinnerup ingerlaannarnissaa pingaaruteqarpoq.

Mary Simonip tikkuarpaa massakkut naalakkersuisuusut aalajangersakkamut akerliullutik taasinnginnerminni, Canadami nunap inoqqaavi attavigisimanngimmatigik. Taamaaliunngillat, naak inatsisit tunngaviusut naapertorlugit apeqqutini taamaattuni nunap inoqqaavi attavigeqqaartussaagaluarlugit.