Mary Simon Canadami naalakkersuisunik aappaagumut aggersaavoq

Mary Simon, Canadami Inuit nunaminni aqutsisuat, Canadami naalakkersuisunik 2010-mi ataatsimeeqateqarnialerpoq. Canadami inuit eqqillillu inuiaqatigiit inuttut aningaasaqarnikkut ajornartorsiutaat ataatsimiititsinissamut pissutaapput.
Allattoq Najaaraq Egede
aggustip 09-at 2009 17:33

The Council of the Federation, naalagaaffeqatigiinnermi siunnersuisartut nunap inoqqaavisa siuttuisa saniatigut sap. akunnerani uani nunap immikkoortuinit 13-ineersut Reginami ukiumoortumik ataatsimiissallutik katersuutissapput.

Mary Simon, Canadami Inuit nunaminni aqutsisuat, 2010-mi naalakkersuinikkut qullersat ataatsimiinnissaannik siunnersuuteqarpoq tamannalu ataatsimiinnermi akuersissutigineqarluni. Taanna suleqatigiissitaliornialerpoq Canadami statsministerip, nunap immikkoortuisa 13-iusut naalakkersuisuisa nunallu inoqqaavisa siuttuisa akornanni aappaagu naalakkersuinikkut qullersat ataatsimiitinneqarnissaannik pilersaarusiortussamik.

Suleqatigiissitami, Mary Simonip tusagassiuutinut oqaaseqarneratut, ”naalagaaffeqatigiinnermi naalakkersuisut, nunat immikkoortuini naalakkersuisut kiisalu nunap inoqqaavisa siuttuisa akornanni naalakkersuisutigoortumik oqaloqatigiinneq aallartinneqassasoq, pissutigalugu nunap inoqqaavisut inuttut aningaasaqarnikkullu ajornartorsiutitta oqallisiginissaat pisariaqarluinnalersimammat”. Taamatut oqaloqatigiinneq maanna aallartinneqassaaq, taamaalillunilu 2010-mi naalakkersuinikkut siuttut nunallu inoqqaavisa siuttuisa qullersaasa ataatsimiinnissaannut oqaloqatigiinneq tamanna piareersaataassammat. Ataatsimiinermi anguniarneqarpoq nuna tamakkerlugu pilersaarutip suliarineqarnissaa, Canadami nunap inoqqaavisa allanut peqataatillugit ukiuni 25-ni tulliuttuni ineriartornissaat ilanngullugu, Mary Simon Inuit Tapiriit Kanatami præsidenti oqarpoq.

The Council of the Federation tassaavoq Canadami isummersuisartut Canadami politikkikkut sunniutillit.