Mary Simon Canadami ministerip sinniisussaatut toqqarneqartoq
Mary Simon piginnaatitsissummik annertuumik pingaarutilimmillu tunineqarpoq.
Issittumi ataatsimoorussamik suleqatigiinnermut ilusiliap nutaap inerisarnissaa pillugu Canadami Naalakkersuisut siunnersussavai.
Mary Simon Canadap Danmarkimi aallartitaatut siornatigut atorfeqarsimavoq ICC-milu præsidentiusimalluni, maannalu nunap inoqqaavinut tunngasunut ministerimut sinniisussaatut toqqarneqarluni.
Canadamiut ministeriat nunap inoqqaavinut issittumilu pissutsinut akisussaasuusoq ilitsersussavaa, taamaaliornikkullu suleqatigiinnissamut ilusiliamik nunap inoqqaavisa ilisimasaannik ilaatigut toqqammaveqartumik ilusilersueqataassalluni, issittumilu aningaasarsiornikkut siuariartortitsisoqarneratigut issittormiut peqqinnerulernissaat uummaarinnerulernissaallu anguniarneqassalluni.
Tamatumunnga peqatigitillugu aamma pinngortitamik illersuinissaq silallu pissusiata allanngoriartornerata unikaallatsinniarnissaa sulissutigineqassaaq.
Naggueqatigiit Inuit ilisimasaat isumaallu aqutseriaatsimik ineriartortitsinermi qitiutinneqarnissaat pingaaruteqartoq, Mary Simon KNR-imut oqaluttuarpoq.
Suliaq sapaatip-akunnerani uani aallartissaaq, nunallu immikkoortuini naalakkersuisut, naggueqatigiit Inuit aamma nunap inoqqaavisa allat taakkulu inuusuttortaasa kattuffii assigiinngitsut oqaloqatigineqassallutik.))
