Mary Simon Canadami Guvernør-Generalinngornissaanut innersuunneqarpoq
Kina Guvernør-Generalinngussanersoq piffissami sivisuumi nalornissutigineqarpoq. Maannalu pisortatigoortumik Mary Simon atorfimmut tassunnga innersuunneqartussanngorpoq, aviisi Gazette nalunaarpoq.
Mary Simon Nunavimmeersoq Canadami tamarmi ilisimaneqarluarpoq.
Canadap issittortaani innuttaasunut ambassadøriusimavoq aamma Danmarkip ambassadørerisimavaa. Inuit Issittormiut Kattuffianni ICC-ip præsidentiusimavoq, maannakkullu Canada-mi inuit kattuffianni Inuit Tapiriit Kanatami præsidentiulluni.
Canadami Guvernør-Generalitut atorfik Canadami atorfiit akimanersaraat, Guvernør-General tuluit dronningiata Canada-mi sinniisorivaa.
Naalagaaffiit pisortaat pisortatigoortumik Canadamut tikeraaraangata Guvernør-General Canada sinnerlugu isumaginnittuusarpoq.
Canadami inatsisartut ataatsimiinnerat ukiut tamaasa Guvernør-Generalip ammartarpaa.
Guvernør-Generalitut atorfik qinnuteqarfigineqarsinnaanngilaq inersuussutigineqartulli akornanni ataaseq ministeriunerup toqqartarlugu.
Guvernør-Generali, dronninngisulli naalakkersuinikkut sulianut akulerunneq ajorpoq, sammineqartunullu aalajangersimasunut sunniuteqarluarsinnaasarluni.
Canadami ministeriunerusup Stephen Harperip ministeriunermini issittumi pissutsinut malinnaalluarpoq, taamaattumillu Canadami atorfiup akimanerpaasup naggueqatigiinnit inunnit pisumit inuttalerneqaraluarpat tamanna pissusissamisuussaaq Marianne Stenbæk Canadamit ilanngutasiissartoq nalunaarpoq. Mary Simonip Guvernør-Generalitut atorfinittussatut innersuunneqarnini suli oqaaseqarfiginngilaa, allat aamma atorfimmut tassunga innersuunneqarmata. Canada-mi tusagassiorfinni Mary Simon Guvernør-Generalitut atorfininnissaa sammineqaleraluttuinnarpoq. Guvernør-Generalitut atorfik qaammatit tulliuttut ingerlaneranni inuttalerneqassaaq.
