Mary Simon ataqqinaammik ilaasortanngortitaavoq
Isummersoqatigiittarfimmi qallunaatut Det internationale Kvinders Forum-imik taaneqartartumi ukiumoortumik naapeqatigiinneq Canadami Montrealimi ippassaq pivoq. Nunarsuarmi arnat nunaminni immikkut ittumik sunniuteqarsimasut isummersoqatigiittarfianni arnanik sisamanik ataqqinaammik ilaasortanngortitsisarneq ukiut tamaasa pisarpoq.
Ataqqinaammik ilaasortanngortinneqarsimasunut ilaapput Tuluit Nunaanni ministeriunerusimasoq Margaret Thatcher aamma Norgemi ministeriunerusimasoq Gro Harlem Brundtland.
Isummersoqatigiittarfiup arnat ataqqiniagai ukiormanna tassaapput naggueqatigiinni inunni arnani siullersaalluni Inuit Tapiriit Kanadami præsidentinngortoq Mary Simon, aappaa tassaalluni Canadami Eqqartuussiviit Qullersaanni eqqartuussisuuneq, pingajuat tassaalluni qaammammuliartartoq canadamiu sisamaallunilu Spaniami ministeri.
Arnanik sisamanik ataqqinaammik ilaasortanngortitsinermi persuarsiornartumi naggueqaterput erinarsortartoq Susan Aglukark inuit ilinniartut inuusuttut erinarsoqatigiivi peqatigalugit qaaqqusat 1200-t aliikkusersorpaat.
Mary Simonip qujaniarnermini Inuit kulturiata eriagineqarnissaata pingaassusia oqariartuutigaa. Aanami pinngortitami issittorsuusartumi qeriuaannartullu masarsuani najugaqartitaanerminni kaannersuaqartaraluartoq ilaqutariinnik qanoq napatitsiniallaqqissimatiginera oqaluttuaralugu. Aanaata kinguaani naggueqatigiit Inuit oqaluttuaatitoqaannik issersuup ataani oqaluttuuttuarsimavai, taamaalilluni kulturitoqaq kinguaaminut ingerlateqqissinnaasimallugu.
Taamaammat Mary Simonip aanami kingornutassiaa maanna nammineq atorlualersimagini erseqqissaatigaa.
Mary Simon maanna 63-inik ukioqartoq inuit pisinnaatitaaffii pillugit ukiorpassuarni sorsusutiginnittuusoq, Inuit Issittorfiut Siunnersuisoqatigiiffiani ICC-mi præsidentiunikuuvoq, soorluttaaq Canadap Danmarkimi aallartitaatut ambassadøritut 1999-imiit 2001-imut sulisimasoq.
Akilinermi ilanngutassiortorput Marianne Stenbæk taama ilisimatitsivoq.
