Mary Simon: Aningaasaateqarfimmik pilersitsisoqarli!

Silap pissusaa pillugu Københavnimi ataatsimeersuartoqalerpat, nunat tamalaat akornanni aningaasaateqarfimmik nutaamik pilersitsisoqarnissaata isumaqatigiissutiginerqarnissaa, Canadami naggueqatitta Inuit suliniaqatigiiffiannit, Inuit Tapiriit Kanatamimit siunnersuutigineqarpoq.
Allattoq Elisa Isaksen
oktobarip 31-at 2009 17:45

Taamaalilluni inuit silap pissusaata allanngorneranit inuunerminnik inuuniarnerminnillu eqqugaasimasut ikiorserneqarsinnaaniassammata.

Stockholmimi Europami pisortat arlallit saavanni Inuit Tapiriit Kanatamimi præsidenti Mary Simon silap allanngoriartornerata naggueqatigiinnut Inunnut qanoq kinguneqarneranik sapaatip akunnerani kingullermi oqalugiarpoq.

- Naggueqatigiit Inuit pissutsit allanngornerinut naleqqussarsinnaasutut naluneqanngillat, maannali nunanit allanit ikiorneqarnissatsinnut piffissanngorsimavoq, Mary Simon oqarpoq.

Taassuma aamma oqaluttuaraa nunaqarfik Salluit, Nunavimmi nunaqarfiit avannarlersaat nunamut qeriuaannarsimagaluartumut kiviartortoq, ingerlaqqillunilu oqarluni avatangiisivut kisimik allanngoriartunngitsut, aammali uumasut pissusilersornerat allanngoriartortoq. Tamannalu pitsaanerulinngilaq uumasut iluaqutiginiarneqarnerat pillugit malittarisassat maleruagassallu soorlu EU-meersut nunanillu allaneersut uisakajaartitsiuarmata, naggueqatigiinnut Inunnut eqquisoq. Assersuutigalugu nannut uumasut ulorianartorsiortinneqartut allassimaffiannut ilanngunneqarnissaat USA-p maannakkut sulissutigaa.

- Taamaattorli, Mary Simon ingerlaqqippoq, naggueqatigiit Inuit naleqqussarsinnaapput tamannalu ukiuni hunnorujulinni ingerlassimavarput. Siunnersuutigalugulu nunani tamalaani inuiaqatigiit, nunarsuaq tamakkerlugu atuuttumik aningaasaateqarfimmik nutaamik pilersitsissasut, nunat inuillu silap pissusaata allanngoriartorneranit uluorianartorsiortinneqartut pissutsinut nutaanut naleqqussarnissaannut atugassanik, neriuutigalugulu silap pissusaa pillugu decembarimi Københavnimi ataatsimeersuarnissami nunat G20-nik taaneqartartut aningaasaateqarfimmik 'Climate Change Adaption Fundimik' taaguutilimmik, tassa nunani tamalaani silap pissusaata allanngoriartorneranut naleqqussarnissamut aningaasaateqarfimmik, pilersitsinissaat pillugu isumaqatigiittoqarumaartoq, aallaqqaammut 100 milliardit koruuninik aningaasaliiffigineqartussamik.