Mary Australiami tulluusimaarutigaat
Kunngissap nuliata naartuneranik tusakkat naartusup nunaanut, Australiamut, soorunami aamma anngutereerput, tamannalu australiamiutuvik immikkut ittumik nalliussineqarpoq.
Kunngissaq Frederiup Mary-llu, tasmaniamiuusup, 2000-imi Olympiadertoqarnerani sutorniartarfimmi baari naapiffiat, qularsaasunut ilaavoq: kikkulluunniit danskisut passillit imigassartugassaminnik pisigaangamik imeruersaatissatik affaannarmik akilissavaat. Kunngissaaraq Christian inunngormat Sydney-mi baari akeqanngitsunik aamma immiaarallerpoq. Aviisi Danmarkimi ullormut saqqummersartoq, Politiken, taama allappoq.
Maryp naartoqqilernera Tasmaniami ministeriunerup aamma nuannaarutigaa.
- Mary naalagaaffitsinni innuttaasorpassuarnit nuannaartorineqarlunilu isumassarsiorfigineqartarpoq, tulluusimaarutitsinnut ilaalluinnartuuvoq, oqarpoq, miserratiginnginnerarpaalu meeraq maajimi inunngoreerpat naalagaaffimmit tunissuteqarnissartik qularinagu.
Aviisimi Politikenimi uagut soqutiginartitatsinnik aamma allassimasoqarpoq: Angajooranngunngikkuni aneeranngortussaq, Christian, danskit tusagassiorfiini ”kunngissaaqqamik” taagorneqartoq – Australiami, oqartarnitsitut, suli torraanerusumik taaguuteqarpoq: taguuteqartinnerami ”Kanngarooq”.
