Mary Arctica ilaasussaanngitsumik ilaasoqartoq
Mary Arctica sikuiuitsoq kujallermut ingerlaartilluni Sydafrikami illoqarfiit pingaarnersaannut Cape Townimut aqqusaarmat, afrikamiu angut umiarsuarmut ikisimavoq.
Assartuut Mary Arctica Cape Townimit aallalermat inuttaasunit misissuiffigineqaqqissaarpoq, aallalernermilu maleruagassat malillugit misissuisoqarluni, Royal Arctic Line-imi paasissutissiisartut pisortaat, Jakob Strøm, oqarpoq. Taamaakkaluartoq afrikamiu Mary Arcticamut ikisimasoq paasineqarpoq.
Angut afrikamiu, umiarsuarmi inuttanit sianigineqarani ikisimasoq, nunat tamat umiarsuit pillugit inatsisaat malillugit pineqaatissinneqarumaarpoq.
Umiarsuaq assartuut Mary Arctica sikuiuitsoq kujalliup eqqaani angalavoq, sikuiuitsoq kujallermi ilisimatuussutsikkut sullissivinnut atortunik assartuilluni.
