Martin Møllerip napparsimanini pissutigalugu ataasiaannarluni unammeqataavoq
Martin Møller, nunarsuarmi pissartanngorniunnerit sapaatip-akunnerata siuliani aallartinnginneraniilli napparsimalerpoq. Taamaattoq sisamanngormat unammissutigineqartussamut isorartuunnginnerusumut sassarpoq, unammissutigineqartussanulli allanut peqataanani.
AAMMA ATUARUK Martin Møller VM-ilinnginnermi napparsimasimasoq
Isorartuallaanngitsumut peqataanissani pilersaarutigaa, soorlu aamma 15 kilometerimut, 50 kilometerimullu immaqalu aamma 30 kilometerimut peqataasussaagaluarluni. Taamaalinngilarli. Ujakkaartartoq KNR-imut taama ilaatigut SMS-erpoq.
- Ajorluinnartutut tigunngilara. Aappaagumut pilersaarusiorluaannassaanga. Pitsaanerpaagama siorna ajorpallaanngilanga, nunarsuarmili pissartanngorniuttoqarneratali nalaani napparsimavunga. Aappaagu OL-ertoqarnissaani periarfissaqaqqikkumaarpunga, tassungami peqataanissara anguniarpara, Martin Møller taama ilaatigut allaaserisaqarpoq.
Martin Møller, nunarsuarmi pissartanngorniunnernit, Finlandimi Lahtimi pisussatut aaqqissuunneqartunit maanna angerlassaaq. Tulliani peqataaffigisassamisut pilersaarutai tassaapput Arctic Circle Race, nunatsinnilu pissartanngorniunnissat.
