ASSIT Martin Møller Arctic Circle Race-mi siuttunngorsimavoq
160 kilometerinit immikkoortunut pingasunut agguarneqarsimasunit siulliit 52,6 kilometerit siuliani ajugaasimasup akunnerni pingasuni, minutsini tyveni, sekundinilu 48-ni atorsimavai. Taamaalilluni canadamiumit Tomas Caslavskymit 29 minutsingajannik sukkaneruvoq, pingajuuvorlu Frederik Lundblad canadamiumit minutsinik marlunnik kingulliulaarluni apuuttoq.
Aamma atuaruk ACR aallartiinnaqaaq
Arfininngornermi oqilaniunneq nanginneqassaaq 53,5 kilometerit ingerlallugit, sapaatikkullu naggaserneqassaaq 53,9 kilometerernermik.
100 kilometerernermut Vittus Heilmann siuttuuvoq, tullersortaa Pavia Tobiassen minutsinik pingasunik kingulliulaartoq. Ivik Jensen pingajunngorpoq akunnermik ataatsimik kingulliulluni apuukkami.
Arnani Kamilla Borutava canadameersoq siulliuvoq. 100 kilometerernermili kalaaliinnaat siulliuniupput. Simigaq Broberg annguppoq akunnerit sisamat, minutsit sisamat sekundillu qulit atorlugit, Maliina Abelsen kingulliulaarluni apuuttoq, Karen Vindfeldilu pingajunngortoq, minutsinik sisamanik siullermiit kingulliulluni.
Peqataasut 138-ipput nunanit assigiinngitsunit aqqanilinneersut, silagissiortinneqarpullu seqinnarimmi qulinik issittumi anoreqanngingajattumilu.
