Martin Møller ACR-imi ajugaassussat ilaattut ilimagineqarpoq
Ujakkaarluni oqilanniuutsitsisarneq illoqarfimmut nunallu immikkoortuanut nittarsaataalluartarpoq:
- Assorujussuaq avataaninngaanniit nittarsaanneqarneranut taassuma nalinga annertoorujussuuvoq. Tassami inuit 160-init peqataasuninngaanniit 40-t missaani nunanit allaninngaanniit tikittarput. Taakkualu nunaminni aviisini apersorneqartarput eqqartorneqartarluni. Taavalu innersuussuseqartarluni maanga Sisimiunut Arctic Circle Racep ingerlanneqarnissaanut. Taamaalilluni nunatta minnerunngitsumillu Qeqqata Kommunianut nittarsaassineq naleqangaatsiartumik ingerlanneqartarsimalluni, Pollas Lyberth, Qeqqani inuussutissarsiornermut siunnersuisooqatigiinni pisortaq, oqarpoq.
Ujakkaarlutik oqilanniuttut nunap timaani tammaarsimaarfissaani toqqit nappartiterneqareersimapput:
- Tupersuit nappaatiternikuuaat. Igaffiit, atisanut panersaaviit, massageaasaarfiit, nakorsiartarfik, paasiniaaviit radioqarfiit. Tamakkorpassuit. Taavalu aamma peqataasut toqqi aamma nappaatiterneqarnikuupput. Taava massakkut kingulliullugit tapersersuisut erfalasui ilisarnaataallu ikkussuunneqarput, Jens Klaus Lennert Arctic Circle Racemi aaqqissuisuneersoq oqarpoq.
AAMMA ATUARUK: Arctic Circle Race 2014 qanillivoq
Ujakkaarlutik oqilanniuttut 160 kilometerit Sisimiut timaani ilungersuanartorsiorfiusartussami ulluni pingasuni ingerlaarfigissavaat. Angutinilu Martin Møller ajugaasussat ilaattut ilimagineqarpoq:
- Tassa ilimagineqartut ilagisariaqarpaat Martin Mølleri. Taava takussavarput taakkua nunanit allaneersut qanoq inissisimajumaarnerat. Kisianni tassa imaassinnaavoq unammillerluarneqalaartoq, Jens Klaus Lennert oqarpoq nangillunilu:
- Arnani aamma pissanganassaaq. Tassani ol-imi guldinnaqqammersoq slovakiarmioq, Anastasiya Kuzmina, peqataasussaangami. Taannalu tassa OL-imi verdensmesterskabimilu ajugaasarnikuuvoq. Taamaammat pissanganassaaq Niviaq Chemnitz Berthelsenilu qanoq unammitigissanersut taakkua marluullutik, Jens Klaus Lennert oqarpoq.
Ujakkaarlutik oqilanniuttussat 159-t saniatigut nammineq piumassutsiminnik ikiuuttut 160-upput:
- Illoqarfitsinnut maanga Sisimiunut kaaviiartitsinermut aningaasanut iluaqutaangaatsiartarpoq eqqarsaatigissagaanni inuit 60-it peqataaneranni, sapaatip akunnerani maaniinneranni, assigiinngitsutitigut hotelinut, vandrehjemminut, neriniartarfinnut pisiniarfinnillu kaaviiartitsinermut iluaqutaasarpoq. Qasserpianut kaaviiaartitsinermut iluaqutaasarnersoq ajoraluartumik kisitsisaatiginnginnatsigu, Pollas Lyberth oqarpoq.
