VIDEO Martin Møller VM-imut sila ajoraluartoq sungiusarluarsimavoq

Sungiusarluarsimasutut misigisimagaluarluni unammersuarnissamut piareersarneq pitsaanerusinnaagaluarpoq.

- Ullut kingulliit (ataasinngormat marlunngormallu, aaqq.) siallerpoq anorlerlunilu taamaammat illup iluani sungiusarneruvunga, nassuiaavoq.

Taamaammat sisoraatit unitsikkallarlugit timigissartarfimmi arpanneruvoq.

- Qasujaallisarlunga sungiusartarpunga, arpattarlunga. Aamma nukkassartarpunga, soorlu talikka, niukka, naakka tunoralu annertungaatsiartumik nukkassartarpakka, nassuiaavoq.

Unammersuarnissamut sivisuumik pilersaarusiorsimavoq

Qujanartumik aputeqaqqilermat ujakkaarluni arpaffissat suliarineqaqqissinnaanngorput, Martin Møllerillu sungiusarnini affaannanngortippaa, sapaatip akunneranut ullut tallimat ullormut marloria sungiusartaraluarluni maanna ullormut ataasiaannaq sungiusartalerami. Taamaalilluni unammersuarnissamut nukissaqarnerussagami.

- Unammiartornissamut sapaatit akunneri arlaqarunnaaraangata sungiusarnerit ikiliartortarput, kisianni unamminissamut qaammatialuinnanngoraangata nukkannissara anguniarlugu sakkortunerpaamik sungiusartarpunga. Taamaammallu sungiusarnerit sioqqutsingaatsiarluni pilersaarusiorluarneqartariaqartarput.

Aamma atuaruk Brugsenip Martin Møller tapersersorpaa

- Ukiarli pilersaarutigisara malippara, taamaammallu sungiusarluarsimasutut misigivunga, Martin Møller oqarpoq.

VM-imi unamminernut sisamanut ilaanissani pilersaarutigaa, 10 km fri (tassa nammineq aalajangerlugu qanoq ujakkaassanerluni, sukuutserlunia klassiskimilluunniit), 30 km skiathlon (tassa sukuutserluni klassiskerlunilu), 15 km fri 50 km-ilu klassisk (qangatoorneq).

Naliginnaasumik Martik Møller ujakkaarluni unamminerni takinerpaaq unammissutigisarpaa, tassa 50 kilometeri, maannali Falunimi 50 kilometererneq klassiskimik ingerlanneqartussaammat - unamminerniit unamminernut allanngorartaramik - ukioq manna 15 km fri-mi pitsaanerpaamik angusaqarnissani ilimagineruaa, tamanna februaarip 25-ani unammissutigineqassaaq.

Karl-Peter Kristensen, Aasiammiu Norgemili najugalik, siullermeerluni inersimasut VM-imi unammissuai.