Martin Møller normu 52-iulluni apuuppoq

Martin Møllerip, Sotjemi ukiuunerani OL-ertoqarnerani nunatsinnit peqataasutuaasup,angut skiathlonimik oqilaniunnerini - tassalu kilometerinut 15-inut klassiskimik oqilianiussinnarluni kilometerinut 15-inut sisoraatinik sukuutserluni oqilaniunnermi normu 52-inngornini iluarisimaarpaa.
februaarip 10-at 2014 04:14

- Klassiskimik oqilaniunnertaa sakkortuvoq. Taamaammat sukuutsernertaanut pigama iluaallaqaanga. Sisoraatikka tassunga assut iluarput - nuanneqaaq, Martin Møller DR-imut oqarpoq.

Møller oqilaniutereernermi kingorna ataatsimut isigalugu naammagisimaartupilussuuvoq, siunissamilu OL-imi angusarissaarnerunissaminut isumalluarluni.

- Angusara naammagisimaarpara. Pikkorinnerpaammi kisimik tassunga ilaapput. Normu 62-inngortussatut ilimagineqaraluarlunga normu 52-itut apuuppunga, tamannalu iluariinnarsinnaavara, Martin Møller oqarpoq.

Oqilaniunnermi iluarinerpaasamini - tassalu kilometerinut 50-inut fri stilernermi - ukiuunerani OL-ertoqarnerata ulluani kingullermi, februaarip 23-iani, normu 40-nngornissaminik anguniagaqarnini naammassisinnaassallugu upperaa.

Tamanna angussaguniuk kalaallini OL-imi angusagissaarnerpaatut inississaaq.

Tamannali pitinnagu - ilaatigut sprintimik oqaliuteqqaartussavoq - tamannalu aqagu marlunngornermi pissaaq.