Martin Møller Italiami takutitsilluartoq
- Nunani tamalaani unamminerni angusama pitsaanersaraat. OL-ip kingorna siuariartoqqissinnaalluni assut nuannerpoq.
- Aallaqqaataaniilli sukkasuupilussuarmik ingerlaartoqarpoq aamma unammeqataasut sukkasuumik eqimattakkuutaalerput. Taamaammat unamminerup aallartinneranillii tamaviaarnaqaaq. Unammeqataanerli nuanneqaaq sungiusarluarsimasutullu misigimalluni aamma nuannivippoq, Martin Møller oqaluttuarpoq.
Sochimi siorna OL-ertoqarmat peqataasoq ajugaasumit Frankrigimiumit Benoit Chauvetimit minutsinik 2.20-nik kigaannerulluni apuuppoq.
Ujakkaartartutoqqamut 42-nik ukiulimmut ajorsartoq
Ullullu marluk qaangiummata ujakkaarutini nalinginnaasut sungiusimanerusanilu atorlugit illoqarfimmi tassani kilometerinut 35-nut aamma unammeqataavoq.
Unamminermi tassani peqataasut tamaviaarnerupput Martin Møllerilu unammeqataasunit 813-iusunit normu 57-iulluni apuuppoq. Ajugaasumit Norgemiumit Anders Aucklandimit minutsinik 5.59-inik kigaannerulluni apuuppoq.
Martin Møller Nuummut maanna angerlartussanngorpoq, sungiusarnissaminullu tamaani periarfissagissaarpoq. Kilometerinut 42-nut sisoraatinik sukuutserutinik ujakkaarluni oqilaniunneq La Sgambeda, Marathon Cupip, km 42-nut imaluunniit taakku qaangerlugit oqilaniunnerit qulingiluat siullersaraat.