Martha Lund Olsen Siumumeersoq nuannarineqarnerpaavoq
Pitsaassuseq 1-miit 5-imut nalileqqusimavaat, 5-i ajunngilluinnartuulluni 1-ilu ajorluinnartuulluni.
Naalakkersuisullu ataatsimut isigalugit 2,5 pointimik nalilerneqarput, tassa ajornatillu ajunnginngillat.
Siumut qinersisartuisa Naalakkersuisut 3,66-imik nalilerpaat Inuit Ataqatigiillu qinersisartuisa 1,74-imik nalilerlugit, aviisi Sermitsiaq taama allappoq.
Naalakkersuisut ilaasortaat ataasiakkaallugit nalilerneqaramik Martha Lund Olsen Siumumeersoq ajunnginnerpaamik nalilerneqarpoq, qinersisartunit tamanit ajunngitsumik nalilerneqarluni.
Ajunnginnerpaat tulliattut nalilerneqartoq Steen Lynge Atassummeersoq aamma tamanit ajunngitsumik nalilerneqarpoq.
Apersorneqartunit tamanit ajornerpaamik nalilerneqartut tassaapput Aleqa Hammond Karl Lyberthilu, Karl Lyberth ajornerpaatut nalilerneqarluni, Aleqa Hammondilu ajornerpaat tulliattut.
Siumumut qinersisartut kisiisa naliliinerat malissagaanni Naalakkersuisut siulittaasuat Aleqa Hammond ajunnginnerpaatut nalilerneqarsimavoq, Jens-Erik Kirkegaardilu ajunnginnerpaat tulliattut nalilerneqarsimalluni. Taakku marluk 4 point qaangerlugu Siumut qinersisartuinit nalilerneqarput.
