Kiffartuussinissamut isumaqatigiissut Martha Lund Olsen: Pitsaanerpaaq angusinnaasara saqqummiuppara

- Pissutsit aallaavigalugit pitsaanerpaaffissaanik iliuuseqarlunga isumaqarpunga, aningaasartuutissat  inuiaqatigiit tamakkiisumik  eqqarsaatigalugit  pitsaanerpaaq angusinnaasara saqqummiuppara, Martha Lund Olsen oqarpoq.

Kiffartuussinissamik isumaqatigiissutit 121, 4 million kr-nik akeqartussaagaluarput.

Aamma atuaruk:Martha Lund Olsen kiffartuussinissamik isumaqatigiissutit pillugit saqqummiussivoq

Kisianni aningaasaqarnermut inatsimmi 2017-mut atuuttussami kiffartuussinissamik isumaqatigiissutinut 22,2 million kr-nik immikkut tapiliunneqarput  tamannalu pisariaqarsimasoq Martha Lund Olsen oqarpoq. 

22,2 million krnit immikkut tapiliunneqartut  avannaani kujataanilu qulimiguut atorlugit ilaasunik angallassinerit amerlanerusut aamma qulimiguut ilaneqarnerinut kiisalu nammineq pisuussutiginngisamik angalanerup unittariaqarnerani unnuinissanut nerisaqarnernullu qulakkeerinninnernut atorneqassapput.

Kiffartuussinissamut isumaqatigiissutissat jannuarip aallaqqaataa tikitsinnagu isumaqatiginniutigineqassapput.

Kalaallit Nunaanni innuttaasut naammagisinnaasaannik aaqqiissuteqartoqartoq Martha Lund Olsen oqarpoq.

- Innuttaasut naligiinnerusumik pinissaat  siunertaralugu, immikkut ittumik aaqqiivugut, Martha Lund Olsen oqarpoq.

Tapiliussatut isumaqatigiissutit ukiup affaa qaangiukkaangat nalilersorneqartassapput.

Aamma atuaruk Qulakkeerininnernut qulimiguullu amerlanerusut

-Kiffartuussinissamut isumaqatigiissummut aningaasat immikkoortinneqartut ukiup affaa qaangiukkaangat  nalilersuiffigineqartassapput,  qanoq ingerlanersut  aamma aningaasat arlaatigut pitsaanerusumik atorneqarsinnaanersut nalilersorneqartassapput, Attaveqatigiinnermut Naalakkersuisoq Martha Lund Olsen

Kiffartuussinissamik isumaqatigiissutinut tunngatillugu pisut

Ilaasunik angallassinermut kiffartuussinissamik isumaqatigiissutit nutaat septembarip 13-iani piareerneqarput. Ingerlaannarli sakkortuumik isornartorsiorneqalerput. Air Greenland, Disko Line aamma Norlandair isumaqatigiissuteqarfigineqarput.

Air Greenlandip kiffartuussinissamik isumaqatigiissutit nutaat pissutigalugit sulisut 45-t soraarsinneqassasut septembarip 14-iani nalunaarutigaa. Disko Line A/S Kujataani angallassisussanngorpoq, timmisartuussinerlu atorunnaarlugu imaatigut angallassineq atorneqarnerulissaaq.

Kiffartuussinissamik isumaqatigiissutit nutaat suli atsioqatigiissutigineqarsimanngitsut septembarip 29-ani tusarliunneqarpoq. Nuuk TV-p tamanna saqqummiuppaa.

Taamani angallannermut naalakkersuisuusoq Knud Kristiansen kiffartuussinissamik isumaqatigiissutit assortuussutaasut pillugit Aningaasaqarnermut ataatsimiititaliamit septembarip 30-ani nukingertumik isumasioqatigiinnissamut aggersarneqarpoq.

Naalakkersuisut siulittaasuata Kim Kielsenip kiffartuussinissamik isumaqatigiisutit nutaat oktobarip 13-iani isornartorsiorpai. Siumup siulittaasuatut atsiorluni tusagassiorfinnut nalunaaruteqarluni taamaaliorpoq.

Kim Kielsenip Atassut aamma Demokraatit oktobarip 31-ani naalakkersuisoqatigiunnaarpai. Aqqaluaq B. Egede aningaasaqarnermut naalakkersuisunngorpoq kiffartuussinissamillu isumaqatigiissutit pitsanngorsarnissaannut 'aningaasarpassuarnik' atuinissaminut piareersimalluni oqaatigaa.

Angallannermut naalakkersuisup Martha Lund Olsenip kiffartuussinissamik isumaqatigiissutit nutartikkat oktobarip 21-ani saqqummiuppai. Tusagassiortunik katersortitsilluni ilassutitut aningaasaliissutit 22 millionit koruuninik aningaasartaqartut saqqummiuppai, ilaatigut billetsit akikinnerulersinnissaannut, aallanngitsoornermut sillimasiinissamut timmisartuussinerillu amerlinissaannut atorneqartussat.