Martha Labansen: - Kommunit naligiittariaqarput

Kommuniulerumaartussat sisamaniit tallimanilluuniit amerlanerunissaannik naalakkersuinikkut aaliangertoqarsinnaanera, Aaqqissuussaanermut Isumalioqatigiissitat, innersuussutiminnik tunniussereersut, siulittaasuata, Martha Labansen-ip, mianersoqqussutigaa. Taamaatoqassappat kommunit pisinnaanerusunut pisinnaannginnerusunullu agguarneqassapput, tamannalu aaqqissueqqinnermi isumaanngikkaluarpoq, Martha Labansen oqarpoq:

- Taamatut pisoqassappat taava pisortatigut allannguinerit allanngornissaat ilimagisinnaanngilarput, tassami inatsisitigut malittarisassat sapinngisamik paasiuminartuusariaqarput, tamanillu malinneqarnissaat aamma nalorninaatsuusariaqarluni. Taamaattumik innersuussutigivarput siunissami kommunit sisamat naligiit pilersinniarneqarniarlik taamaalilluni taakkua akisussaaffiit annertuut namminneq tigusinnaasanik namminneq aqussinnaalissavaat, taavalu aamma sinerissami inaarsaaneq annertunerusoq ingerlanneqarsinnaalissaaq. Qitiusumut apuutitsisaqattaarneq taavalu aatsaat qitiusuminngaanniit aningaasaliisoqarneratigut imaluunniit akuersisoqarneratigut ingerlaniartarnerit kingunerinikuummassuk sinerissami ineriartorneq kigaatsumik ingerlasoq, KANUKOKA-p pisortaa Martha Labansen taama oqarpoq.