Martha: Isornartorsiuineq tunngavissaqanngilaq
Taakku isornartorsiuttaannut akilluni, Ilaqutariinnermut Naalakkersuisoq oqarpoq, Inuit Ataqatigiit naalakkersuisuutitaqarnerminni meeqqat siunissaasa pilersaarusiorneqarnerat pillugit suliatik isornartorsiuinermi ilanngussimasariaqaraluaraat.
- Nalunaarusiaq siulleq 2011-mi februaari takkuppoq, tassani ulloq unnuarlu paaqqinnittarfinni inissinneqarsimasut pillugit pilersaarusiorneqarsimanngitsoq atuarneqarsinnaalluni. Taamanili pilersaarusiortoqarsimagaluarpat, taava ullumikkut pilersaarusiaq peqqissaartumik suliarineqalereersimassagaluarpoq, Matha Lund Olsen taama oqarpoq.
Inuit Ataqatigiit sinnerlugit Inatsisartunut ilaasortap, Juliane Henningsenip meeqqat siunissaat pillugu pilersaarusiortoqarsimannginnera ajuusaarutigalugu oqaatigaa.
- Soorunalimi ajorluinnarpoq, meeqqat angajoqqaaminniit isumagineqanngereersut pisortanit aamma isumagineqarsimanngimmata, tamannalu ajuusaarnarpoq.
AAMMA ATUARUK VIDEO Meeqqat angerlarsimaffiup avataanut inissinneqartut isumaqatigiinngissutigigaat
Juliane Henningsenip ilanngullugu oqaatigaa, siorna killiffik eqqarsaatigigaanni nikeriartoqarsimanngitsoq.
- Meeqqat pillugit suliap naammassineqarnissaa pillugu, Naalakkersuisut kommuninut attaveqarnissaat Inuit Ataqatigiinniit siornali ujartulerparput. Kisianni Naalakkersuisut tamassumunnga piniaasaarsimapput, tassami suliaq manna kommuninit suliarineqartussaavoq. Kiisa inatsit nutaaq atuuttussanngulerpoq, isumaqarpungalu meeqqat pillugit oqaloqatigiinneq aamma piumasaqaateqarneq annikippallaarsimasoq, Juliane Henningsen oqarpoq.
Meeqqat angerlarsimaffiup avataani inissinneqartartut pillugit sullissineq sivisuumik sukumiisumillu suliassaasarmat, utaqqineq ilinniarneqartariaqartoq Martha Lund Olsenip eqqaamaqquaa aamma oqarluni suliaq tamanna maanna qaammatip pingasut missaannik suliarineqarluni aatsaat aallartimmat, tamanna paasineqartariaqartoq.
- Isumaqarpunga Juliane Henningsenip taama isornartorsiuinera pissutissaqanngitsoq. Eqqarsaatigisariaqarpaa inunnik sullissineq imaannaanngitsuusoq. Suliaq peqqissaarullugu suliassaavoq. Septembarip aallaqqaataata tungaanut piffissaqarluta paasiniaavugut, maannalu tassa nalunaarusiaq allanneqaleruttorpoq. Tamanna Juliane Henningsenip utaqqisariaqarpaa.
Ilaqutariinnermut Inatsisinullu atuutsitsinermut Naalakkersuisup, Martha Lund Olsenip ilanngullugu oqaatigaa, meeqqat angerlarsimaffiup avataani inissinneqartartut pillugit misissuinermi, 2011-mi pisumi, paasineqareersimammat meeqqat siunissaat pillugu pilersaarusiornissaq ajornakusoortuusoq.
