Marsip ilisimatusarfigineqarneranut sermersuaq iluaqutaavoq
Sermersuarmi tappiorarnartumik uumasuaqqanik nassaartoqarpoq. Tappiorarnartut taakku sermersuarmi 3,2 kilometerisut ititigisumiipput.
Ilisimatuullu ilimagaat, qaammataasami Marsimi uumasoqarsimassasoq.
Tappiorarnartuaqqat taakku tasami nilleqisumiittut metangas-imik aniatitsisarput, metangassilu tassaavoq uumassusilinniit gassi aniasartoq.
Maani nunarsuarmi inuuffitsinni metan-i masarlunni, narsaatinilu takussaasartoq Amerikamiu Californiami universitetimeersoq fysikkimik ilisimasalik Buford Price oqarpoq.
Siorna paasineqaqqaarpoq, taakku tappiorarnartut metanit Marsimi aamma nassaassaasut, tamannalu paatsiveerutitsileraluarpoq, tassami nalinginnaasumik metani taanna uumassuseqartuunninnaq nassaarineqarsinnaammat, taamatuttaaq seqernup qinngorneranit piuneerutsinneqarsinnaalluni.
Tamakku tunngavigalugit maanna ilimagineqalerpoq, metani taanna marsip silaannarsuani aamma pilertarsimassasoq.
Tassami nunatta sermersuaani taamatut uumassusilinnik peqarsimassappat, taava aamma ilimagineqalerpoq, marsip silarsuaani aamma allanik uumassusilinnik peqarsimasinnaanera.
