Marrarmik spiraliliat 4500-t kalaallillu suliaat allat
Eqqumiitsulianik saqqummersitsinermini nutaami Kristine Spore Kreutzmannip kalaallit eqqumiitsuliaasa eqqummiitsuliornikkullu assassugaasa amerlalluinnassusiat takutinniarpaa.
- Neriuppunga inuit takulissagaat, kalaallit eqqumiitsuliaat tassaannaanngitsut tupilaat, arsarnerit ulullu, Kristine Spore Kreutzmann oqarpoq.
Eqqumiitsuliat maannamiit juullip tungaanut Bornholmimi Grønbech Gårdimi saqqummersinneqassapput. Tamatuma kingorna saqqummersitat Nunani Avannarlerni ingerlaartinneqassapput, naggataatigullu aappaagu Nuummi saqqummersinneqassallutik.
Kristine Spore Kreutzmannip eqqumiitsuliat toqqarpai pitsaassuseqarluartuunissaat pingaartillugu. Saqqummersitsinermut ilaapput Kalaallit Nunaanni pinngortitarsuarmik kalaallillu kulturiannik unnersiutiginnittut aamma suliat - Kristine Kreutzmannip nammineq suliaatut – spiralilersuisimanermik paasinnilersitsisussat.
Kisitsisit malugineqarsinnaasunngoraangata
Kristine Spore Kreutzmannip suliaannut isumassarsititsisuuvoq, arnanut imminnut tunngatillugu pisimasunut ilungersuuteqartunut ikiuukkusunneq, spiralilersuisimanerup suli annertunerusumik ukkatarineqaleqqullugu. Spiralit marrarmik suliaapput, spiralit 1970-ikkunni atorneqartut ilusaat angissussaallu aallaavigalugu.
Spiralit tigussaasunngorlugit suliarinissaat toqqarpaa, arnat inuusuttut namminneq piumassuserinngisaminnik spiralilersorneqartut amerlalluinnassusiat ersarinnerulersinniarlugu.
Kristine Spore Kreutzmannip spiralit taama amerlatigisut takulerlugit nammineq qisuarnini tupaallaatigaa. TV2 Bornholmimit apersorneqarnermini spiralit nerrivimmut siammartiterpai, spiralillu ataatsimut amerlassusaat siullermeertumik takullugit.
- Spiralit qaleriiaat qanorlu amerlatigineri takulerlugit nammineq annilaajallappunga. Ilukkut attortippunga. Taama ilimasunngikkaluarama,oqarpoq.
Suliami aallartinnginnerani, arnat spiralilersuinermit eqqugaanikut oqaloqatigisarpai, pisimasup taakkununnga tunngasup pingaartillugu isiginiarnissaa akueritinniarlugu.
