Marlunnik qinigaaffeqarneq pitsaaquteqarpoq - pingasunik naamik

Siumumit folketingimut qinigassanngortittoq Doris Jakobsen tamanna pillugu ima oqarpoq.

- Isumaqarpunga pingasunik ataatsikkut ilaasortaaffeqarneq mianernartuusoq taamaattumik Folketingimut qinigaassagaluaruma kommunalbestyrelsemit issiajunnaarnissara qinissavara.

Doris Jakobsen aamma oqarpoq qinigaassaguni kommunalbestyrelsemiit sulinngiffeqarniarluni.

Siumut siulittaasuata Aleqa Hammondip oqaatigaa Kommunalbestyrelsemi aamma Folketingimi ataatsikkut ilaasortaaffeqarneq mianerisariaqartoq, Inatsisartuni folketingimilu ataatsikkut ilaasortaaneq ajoriffissaqartinnagu.

- Inatsisartut aammalu Folketingimi oqaluuserineqartartut imminnut ataqatigiittarput, tamannalu namminerisamik ajoriffissaqartinngilarput, Kommunalbestyrelsemili Folketingimilu oqaluuserineqartartut imminnut ataqatigiittaratik. Taamaattumik folketingimi ilaasortaaneq salliutinneqartariaqarpoq, Aleqa Hammond oqarpoq.

Siumumit Folketingimut qinigassanngortippaat Doris Jakobsen, Akitsinnguaq Olsen, Vittus Qujaaukitsoq aamma Nick Nielsen.

Folketingimut qinersinermi Siumumut unammilernerpaassagunartut, tassalu Demokraatit marlunnik qinigaaffeqarsinnaaneq aamma akuersaarpaat, tassalu Inatsisartuni folketingimilu qinigaaffeqarneq. Justus Hansen Demokraatineersoq ima oqarpoq.

- Uanga nammineerlunga isumaga naapertorlugu Folketingimut qinigaassagaluaruma kommunalbestyrelsemi issianera allamut tunniutissagaluarpara tassami pingasunik qinigaaffeqarneq ingasappallaarami, Justus Hansen oqarpoq.

Demokraatit, Inuit Ataqatigiit, Atassut aamma Kattusseqatigiit Partiiata maannamut suli nalunaarutiginngilaat kikkut taakkunannga qinigassanngortissanersut.