Marlunngornermi aamma timmisartorsuaq ingerlaassanngilaq
Air Greenlandip Københavnimiit Kangerlussuarmut timmisartuussinissaa marlunngorneq maajip 24-at timmisartuussinissani taamaatiinnarpaa Islandimi qaqqap innermik anitsisartup Grimsvotn-ip anitsinerata kingunerisaanik. Eqqorneqartussanut ilaapput Kalaallit Nunaata iluani timmisartuussinissat timmisartorsuarmut ilaaniartunut attuumassutillit, Air Greenland nittartakkamini taama nalunaarpoq.
Tamannalu Air Greenlandip sillimanissamut piumasaqaatit malittarisassanillu eqqortitsisinnaannginneranik peqquteqarpoq. Atlantikup avannaanni timmisartuussinermi minnissaq pisariaqalissagaluarpat mittarfimmut qaninnermut ungasissorujussuussinnaasarpoq. Taamaattumik Air Greenlandip illersorsinnaasorinngilaa timmisartuussinerup ingerlanneqarnissaa.
- Ilaasut eqqugaasut angalanissaat timmisartuussinerit ingerlaqqilerpata inissaqarneq apeqqutaatillugu nuunneqassapput. Marlunngornermi angalasussaagalugit Air Greenlandimiit sms-ikkut, e-mailikkut imaluunniit oqarasuaatikkut attavigineqassapput. Ataasinngornermi angalasussaagaluit nittartakkatsigut paasissutissanut malinnaaqquagut, timmisartuussinerit aallarteqqippata aatsaat attavigineqassammata, Air Greenland nalunaarpoq.
Imarpik ikaarlugu angalanernik tuniniaaneq Air Greenlandip unitsikkallarpaa tallimanngorneq maajip 27-at ilanngullugu.