Marlulissat assigiilluinnartut assigiinngitsunik atisalersorlutik sermersuaq itivinniaraat

Atisat nutaaliat isugutsinnginnissaannik, kissassimaartitsinissaannik imermillu pitarneqarsinnaannginnerinik neriorsuutit eqqorpat imaluunniit qanga issittumi ilisimasassarsiortartut atortorissaarnerusimappat.
Allattoq mlk, Simon Uldum
maajip 02-at 2014 08:57

Marlulissat tuluit assigiilluinnartut, Hugo aamma Ross Turnerikkut tamanna misileraatiginialerpaat. Qatanngutigiit Sermersuaq itivinniarlugu Kangerlussuarmit ippassaq aallarput.

Marlulissap aappaa nutaaliaalluinnartunik atisaqarpoq. Kulfiberimik sanaanik sisoraateqarlunilu glasfiberimik sanaanik qamutinik oqilluinnartunik kalitaqarpoq, marlulissallu aappaa issittumi ilisimasassarsiortup Ernest Shackletonip Sikuiuitsumut Kujallermut 1914-17-imi ilisimassarsiornerani atortut assinginik atortulersorsimalluni. Tassalu qamutit qisummik sanaat pundinik 26-inik oqimaassusillit norgemiullu sisoraataat qisuit. Sorliup suut atussanerai makitsinikkut aalajangerneqarsimavoq.

- Issittumi ilisimasassarsiortut Shackletonitut ittut ukiut 100-t matuma siorna atugaasa qanoq ilungersunarnerutigisimanerat paaserusupparput, Hugo Turner oqarpoq.

Angalanerulli siunertarpiaa tassaavoq qiteqqakkut ajoqusernerit ilisimatusarfiginissaannut aningaasanik katersinissaq. Hugo Turnerimi pissilluni qungasini napisimavaa peqqissivinnissanilu anguniarlugu sungiusarluni ilungersungaatsiarsimalluni. Qatanngutigiit ukiut marluk matuma siorna allat marluk peqatigalugit ipuinnaq Atlantiku ikaarpaat.

Marlulissat ullut 20-30-t qaangiuppata Tunumut apuutissangatinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq