Marloriaammik annaassiniarneq

Nanortalimmi umiatsiaq inersimasunik sisamanik naalungiarsummillu ataatsimik issimasulik sikorsuarnit mattussaasimavoq ingerlariaqqinnerlu ajulerluni.

Qulimiguulik annaassiartortoq takkummat inersimasut pingasut naalungiarsullu Nanortalimmut oqqunneqarput.

Umiatsiamilli piginnittoq annaassiniartunut ilaarusussimanngilaq umiatsiani annaajumanagu isumannaaqqaarusukkamiuk. Naallu annaassiniarnerup nalerpiaani sikorsuarnit anillakaassinnaanngikkaluarluni naammattunik taquaqarsimavoq qimaannaqqusimallunilu.

Aqaguani umiatsiaq sikorsuit ima nikisitsigisimavaat, allaat nunamut sikorsuarnit kiggigunneqarsinnaajunnaarlugu pitunneqarsinnaasimalluni. Taamaalimmat aatsaat angutip qulimiguulimmut arfininngornermi ualikkut ikinissani akuerisimavaa, taama Nanortalimmi politeeqarfiup pisortaa Michael Poulsen nalunaarpoq.

Umiatsiaatillip tallimanngornermili annaateqqusimannginnera politimestereqarfimmit assut eqqarsarnartoqartinneqarpoq.

- Annaassiniarnermi oqartussat inassutaat malinneqartussaapput, malinneqanngippatami umiatsiamiittut annaassiniaqataasullu inuuneri navianartorsiortinneqaannassammata. Annaateqqunngikkallarneq pissutigalugu annaassiniartartut pinartumik allamik suliaqaleriataarsinnaanerannut ajoqutaasinnaammat eqqarsarluaqqaartarnissaq inassutigaarput, vicepolitimeteri Morten Nielsen tusagassiuutinut nalunaarpoq.

Maanna politimestereqarfiup Kangilinnguani sakkutooqarfik peqatigalugu nalilersuleruttorpaa angutip tallimanngornermi, umiatsiani uffa sikorsuarnit kiggiguteqqasoq, issimaqatimisulli Nanortalimmukaateqqunnginnera akiligassiinermik kinguneqartinneqassanersoq.