Marloriaammik akileraaruserneqannginnissaq pillugu isumaqatigiissuteqarput
Danskit kalaallillu akornanni marloriiaammik akileraaruserneqannginnissaq pillugu isumaqatigiissummut tapiliussatut isumaqatigiissusiaq Aningaasaqarnermut Nunanullu allanut Naalakkersuisup, Aleqa Hammondip, aamma danskit akileraartarnermut ministeriata, Kristian Jensenip, Ilulissani pingasunngormat ataatsimiinnerminni isumaqatigiissutigaat.
Allattoq Mads Lynge
aggustip 22-at 2008 05:08
Tapiliussatut isumaqatigiissuteqarnerup taamaasilluni Kalaallit Nunaata nunat avannarliit allat ilutigalugit marloriiaammik akileraaruserneqannginnissaq pillugu isumaqatigiissutaannut naleqqusarneqarpoq. Ilaatigut isumaqatigiissut makkunannga imaqarluni:
- Ukiut tallimat ingerlaneranni iluanaarutisianit akileraarutip annerpaaffissaa appartikkiartuaarneqassasoq annerpaamik 35 procentinut.
- Imartami uuliamik suliaqarnermut ingerlatsivinnut akileraarutitigut suliaqarnerup nutaanik aamma erseqqaarinnerusunik maleruagassiuunneqarnera.
- Danmarkimiit Kalaallit Nunaannut soraarnerussutisianit akileraaruteqanngitsumik nuussisinnaanerup ammaateqqinneqarnissaa. Isumaqatigiissummi tamatumunnga tunngasoq 2011-imi atorunnaassaaq.
