Marloriaammik akileraartarunnaassapput

Danmarkip nunattalu akornanni umiartortut siunissami marloriaammik akileraannginnissaat anguneqarpoq.

Danskit Akileraartarnermut ministeriat Kristian Jensen, ullumi Narsarsuarmut tikippoq, danskit kalaallillu akornanni akileraartarnermi ilassutitut isumaqatigiissutaat atsioqataaffigiartorlugu.

Aningaasaqarnermut Naalakkersuisup Josef Motzfeldt–ip isumaqatigiissummik kujataani atsioqataasussap, Kristian Jensen Narsarsuarmut tikilluaqqujartorpaa.

Royal Arctic Line–p atlantikukkut assartuutaani aammalu Arctic Umiaq Line–p umiarsuaani umiartortunut isumaqatigiissut iluaqutaassaaq, tassa taakku akileraartinneqartarput ilanngaasereerlugit, allat aningaasarsisinneqartartut ilanngaaserneqanngitsunik.

- Akileraarnermi ilassutitut isumaqatigiissut, umiartortut pineqartut ajornerusumik atugaqannginnissaanik siunertaqarpoq. Tassa marloriaammik akileraarusiinnginnissamik imaqarluni, taannalu kujataani atsiorneqassaaq, Kaare Hagemann, Namminersornerullutik Oqartussani Akileraartarnermut Pisortaqarfiup pisortaanera oqarpoq.