Marloqiusamik sulineq ajorinngilaat

januaarip 25-at 2005 10:09

Folketingimut qineqqusaartussat inatsisartuni ilaasortaareersut, Folketingimut qinigaassagaluarunik marloqiusamik suliffeqalersinnaanertik assigiinngitsunik isumaqarfigaat.

Kattusseqtigiinneersoq Anthon Frederiksen Folketingimut qinigaassagaluaruni Ilulissani borgmesteriunerminit tunuarniarpoq. Isumaqarporli inatsisartuni ilaasortaaneq Folketingimut ilaasortaanermut attuumassuteqarluartoq, taamaattumillu tassani issiaannassalluni.

Augusta Salling, Atassummeersoq, Folketingmut qinigaassagaluaruni Atassummi siulittaasuunini apeqqusersinnaavaa. Augusta Sallingili isumaqarpoq inatsisartuni ilaasortaanerup saniatigut Folketing-imi sulisoqarsinnaalluartoq.

Doris Jakobsenip, Siumumeersup Folketingimut qinigaassagaluaruni inatsisartuni ilaasortaanini ingerlartiinnarniarpaa.

Demokraatit siulittaasuat Per Berthelsen isumaqarpoq inatsisartuni ilaasortaaneq Folketing-mut ilaasortaanermut attuumassuteqarluartoq. Folketingimullu qineqqusaartussat politikkikkut sulinermi misilittagaqarluarnissaat pisariaqarsoraa.

Inatsisartuni ilaasortat Folketingimut qinigaagunik Folketingimut ilaasortaanerminni akissarsiaqaatigalutik inatsisartuni ilaasortaanerminni akissarsiatik aamma pigiinnassavaat.