Marloqiusamik suliffillit
Nunatsinni inatsisartuni ilaasortaalersut amerlanersaat allamik suliaqarput, ilaatigut borgmesteriullutik kommunalbestyrelsemiluunniit ilaasortaaffeqarlutik.
Aviisip Sermitsiap ilaasortanngortunut sianeqattaarneranni tamanna paasineqarpoq.
Naalakkersuinermik suliaqartut 2003-mi namminneq aningaasarsiaminnik 40 procentimik – ukiumut 96.000 koruuninik qaffaanerannut naapertuutinngilaq.
Taamanikkut inatsisartuni sulineq suliffiup nalinginaasup sivisussusseqarnera tunngavilersuutaavoq.
Inatsisartuni ilaasortat ikittuinnaat Sermitsiap oqaloqatigisimasai tunngavilersuummut tassunga isumaqataapput. Soorlu assersuutigalugu Ilulissani borgmesterip, Kattusseqatigiinneersup Anthon Frederiksenip, qinikkatut ilaasortaaffiit arlallit suliarisinnaalluarligut oqarsimavoq.
- Borgmesteriullungalu inatsisartuni ilaasortaanissara sapinngilara, aviisimut Anthon Frederiksen taama oqarpoq. Anthon Frederiksen aamma namminersortutut inuussutissarsiuteqarpoq.
